മുതലമട: ചുള്ളിയാര് ഡാമിലെ ജലനിരപ്പ് 56.5 അടിയിലെത്തി. മഴ തുടര്ന്നാല് ഡാം തുറക്കുമെന്ന് അധികൃതര് മുന്നറിയിപ്പ് നല്കി. വൃഷ്ടിപ്രദേശത്ത് മഴ തുടരുന്നതാണ് ജലനിരപ്പ് ഉയരാന് കാരണം. പലകപ്പാണ്ടി വെള്ളച്ചാട്ടത്തില്നിന്ന് കനാല് വഴിയുള്ള ജലസേചനം നിര്ത്തിവെച്ചിട്ടുണ്ട്. മീങ്കര ഡാം വഴിയുള്ള ലിങ്ക് കനാലിലെ നീരൊഴുക്കും നിര്ത്തിവെച്ചു. മഴ തുടര്ന്നാല് ഡാം തുറക്കുമെന്ന് എ.ഇ എസ്. സിത്താര അറിയിച്ചു.
മീങ്കര ഡാമില് ജലനിരപ്പ് 37.7 അടിയിലെത്തി. ചൊവ്വാഴ്ച 38.1 അടിയിലായിരുന്ന ജലനിരപ്പ് ലിങ്ക് കനാല് വഴി ചുള്ളിയാര് ഡാമിലേക്ക് വെള്ളം തുറന്നതോടെയാണ് 37.7 അടിയിലെത്തിയത്. നിലവില് ലിങ്ക് കനാല് അടച്ചു. മൂലത്തറ വെള്ളത്തിന്റെ വരവും നിര്ത്തിവെച്ചതായി അധികൃതര് പറഞ്ഞു. മീങ്കര ഡാം വൃഷ്ടിപ്രദേശത്ത് ബുധനാഴ്ച മഴ കുറവായിരുന്നു.