![“Manju”](https://santhigirinews.org/wp-content/uploads/2020/04/YOUTUBE.jpg")
അടിസ്ഥാന പലിശ നിരക്കുകളില്‍ സ്റ്റേറ്റ് ബാങ്ക് ഓഫ് ഇന്ത്യ മാറ്റം വരുത്തി. നിലവില്‍ ബാങ്കില്‍ നിന്നും വായ്പ എടുത്തവര്‍ക്ക് വലിയ തിരിച്ചടിയാണ് ഇതിലൂടെ ഉണ്ടാവുക. അടിസ്ഥാന പലിശ നിരക്കുകളില്‍ 10 ബേസിസ് പോയിന്റ് ആണ് വര്‍ധിപ്പിച്ചിരിക്കുന്നത്. അടിസ്ഥാന നിരക്കുകളില്‍ വര്‍ദ്ധന ഉണ്ടാവുന്നത് പലിശ നിരക്കുകളിലെല്ലാം വര്‍ദ്ധനയുണ്ടാകും എന്നതിന്റെ സൂചനയാണ്. അതായത് പലിശനിരക്കുകള്‍ കുറഞ്ഞു വന്നിരുന്ന ട്രെന്‍ഡ് അവസാനിക്കുന്നുവെന്ന് വ്യക്തം.
ഡിസംബര്‍ ആദ്യവാരം 65 ലേക്ക് താഴ്ന്ന ക്രൂഡോയില്‍ വില ഇപ്പോള്‍ വീണ്ടും 72 ലേക്ക് തിരിച്ചെത്തിയിരിക്കുകയാണ്. ഇതിനര്‍ത്ഥം ആഗോളവിപണിയില്‍ ഇന്ധന ഉപഭോഗം കൂടുന്നുവെന്നാണ്. മൈക്രോണ്‍ വകഭേദം കാര്യമായ പ്രത്യാഘാതം ഉണ്ടാക്കാതിരിക്കുകയും മൊത്തവില സൂചികയില്‍ രണ്ടക്ക വര്‍ധന ഉണ്ടാവുകയും അതുവഴി ഉപഭോക്തൃ വില സൂചികയില്‍ മാറ്റമുണ്ടാവുകയും ചെയ്യുന്ന സാഹചര്യത്തില്‍ റിസര്‍വ് ബാങ്ക് പലിശ നിരക്കുകള്‍ ഉയര്‍ത്തുമെന്ന ഇപ്പോഴത്തെ കണക്കുകൂട്ടല്‍ ശരിയായി വരും.
പലിശനിരക്കുകള്‍ ഉയരുന്നത് സ്ഥിരനിക്ഷേപം ഉള്ളവര്‍ക്ക് അനുകൂലമായ ഘടകമാണ്. രണ്ടു പതിറ്റാണ്ടിലേറെ ഏറ്റവും കുറഞ്ഞ പലിശയാണ് ഇപ്പോള്‍ സ്ഥിര നിക്ഷേപങ്ങള്‍ക്ക് കിട്ടിക്കൊണ്ടിരിക്കുന്നത്. എന്നാല്‍ വായ്പയെടുത്ത് ഇരിക്കുന്നവര്‍ക്ക് ഇത് തിരിച്ചടിയാണ്. കാരണം അവര്‍ക്ക് ഏറ്റവും കുറഞ്ഞ പലിശ ആയിരുന്നു ഇതുവരെ ലഭിച്ചുകൊണ്ടിരുന്നത്. അതിനി ഉയരും.
