നടി കീർത്തി സുരേഷിന് കൊറോണ
തിരുവനന്തപുരം : പ്രശസ്ത സിനിമാ താരം കീർത്തി സുരേഷിന് കൊറോണ സ്ഥിരീകരിച്ചു. രോഗവിവരം താരം തന്നെയാണ് സമൂഹമാദ്ധ്യമത്തിലൂടെ അറിയിച്ചത്. രോഗം സ്ഥിരീകരിച്ചതിന് പിന്നാലെ സ്വയം നിരീക്ഷണത്തിൽ പോയെന്നും നടി അറിയിച്ചു. നിലവിൽ നേരിയ രോഗലക്ഷണങ്ങൾ മാത്രമാണ് പ്രകടമാകുന്നതെന്നും കീർത്തി സുരേഷ് കൂട്ടിച്ചേർത്തു.
കൊറോണ സുരക്ഷാ മാനദണ്ഡങ്ങൾ കൃത്യമായി പാലിച്ചും വൈറസ് ബാധിച്ചു. വൈറസ് പടരുന്നതിന്റെ തോത് ഭയപ്പെടുത്തുന്നതാണ്. അതുകൊണ്ടുതന്നെ സുരക്ഷിതരായിരിക്കാൻ ഏവരും കൊറോണ സുരക്ഷാ മാനദണ്ഡങ്ങൾ പാലിക്കുക. ഇപ്പോൾ നിരീക്ഷണത്തിലാണ്. അടുത്തിടെ താനുമായി സമ്പർക്കത്തിലേർപ്പെട്ടവർ കൊറോണ പരിശോധന നടത്തണമെന്നും കീർത്തി സുരേഷ് സമൂഹമാദ്ധ്യമത്തിലൂടെ അഭ്യർത്ഥിച്ചു.
കൊറോണ വാക്സിൻ ഇനിയും സ്വീകരിക്കാത്തവർ ഉടനെ സ്വീകരിക്കുക. ഗുരുതര രോഗലക്ഷണങ്ങൾ ഒഴിവാക്കാനും, പ്രിയപ്പെട്ടവരുടെ ആരോഗ്യത്തിനുമായി എത്രയും വേഗം വാക്സിൻ സ്വീകരിക്കുക. എത്രയും വേഗം സുഖം പ്രാപിക്കുമെന്നാണ് പ്രതീക്ഷിക്കുന്നതെന്നും താരം പറഞ്ഞു.