ഏഷ്യയിലെ ഏറ്റവും വലിയ ചേരിയായ ധാരാവിക്ക് ഇനി പുതിയ മുഖം
മുംബൈ : ഏഷ്യയിലെ ഏറ്റവും വലിയ ചേരിയായ ധാരാവിക്ക് ഇനി പുതിയ രൂപം . ധാരാവിയുടെ പുനര്വികസനത്തിനുള്ള ഒരുക്കങ്ങള് പൂര്ത്തിയാക്കാൻ സംസ്ഥാന സര്ക്കാരിന്റെ അന്തിമ അനുമതി ലഭിച്ചു. ധാരാവിയുടെ പുനര്വികസന പദ്ധതി ഗൗതം അദാനി ഗ്രൂപ്പിനാണ് കൈമാറിയിരിക്കുന്നത്. പദ്ധതി ധാരാവിയെ പുനരുജ്ജീവിപ്പിക്കുമെന്ന് ഗൗതം അദാനി പറഞ്ഞു .
കമ്പനിയുടെ നിക്ഷേപകരെയും ഓഹരി ഉടമകളെയും അഭിസംബോധന ചെയ്ത് ഗൗതം അദാനി എഴുതിയ കത്തിലും ഇതേ കുറിച്ച് പറയുന്നുണ്ട്. കത്തില്, ധാരാവിയുടെ വികസനത്തെക്കുറിച്ച് ചര്ച്ച ചെയ്യുന്നതിനിടെ, ബോക്സിംഗ് ഇതിഹാസം മൈക്ക് ടൈസണ്, പ്രശസ്ത ചലച്ചിത്ര സംവിധായകൻ ഡാനി ബോയ്ല് എന്നിവരെയും അദാനി പരാമര്ശിച്ചു. ടൈസണിന് തിരിച്ചറിയാൻ കഴിയാത്ത തരത്തില് തന്റെ സംഘം ധാരാവിയെ വികസിപ്പിക്കുമെന്ന് അദ്ദേഹം പറഞ്ഞു.
ഇന്ത്യയില് രണ്ട് കാര്യങ്ങള് കാണാൻ ആഗ്രഹിക്കുന്നുവെന്ന് മൈക്ക് ടൈസണ് തന്റെ അഭിമുഖത്തില് പറഞ്ഞിരുന്നു. അതില് ഒന്ന് താജ്മഹലും മറ്റൊന്ന് ധാരാവിയുമായിരുന്നു . അതുകൊണ്ടാണ് ധാരാവിയുടെ പുനര്വികസന പദ്ധതി പൂര്ത്തിയാക്കിയ ശേഷം ടൈസണ് ധാരാവിയില് തിരിച്ചെത്തിയാല് അദ്ദേഹത്തെ തിരിച്ചറിയാൻ കഴിയില്ലെന്ന് അദാനി പറയുന്നത്. രാജ്യത്തിന്റെ സാമ്പത്തിക തലസ്ഥാനമായ മുംബൈയില് സ്ഥിതി ചെയ്യുന്ന ധാരാവി ചേരി പതിറ്റാണ്ടുകളായി ചര്ച്ചയിലാണ്. ഒരു വശത്ത്, ബിഎസ്ഇ, എൻഎസ്ഇ തുടങ്ങിയ ഓഹരി വിപണികളും, നിരവധി ഇന്ത്യൻ, ബഹുരാഷ്ട്ര ഭീമൻമാരുടെ ഓഫീസുകളുമുള്ള അതേ മുംബൈയില് തന്നെ ധാരാവി ടൗണ്ഷിപ്പും ഉണ്ട് . അത് ഇന്നും നിരവധി അടിസ്ഥാന സൗകര്യങ്ങളില്ലാത്തതാണ്. ഒരേ നഗരത്തിലെ സമ്പന്നതയുടെയും ദാരിദ്ര്യത്തിന്റെയും ഈ വൈരുദ്ധ്യം ലോകമെമ്പാടുമുള്ള ആളുകളെ ആകര്ഷിക്കുന്നു.
ഡാനി ബോയ്ലാണ് ധാരവിയെ ലോകത്തിന് മുഴുവൻ പരിചയപ്പെടുത്തിയത്. ധാരാവിയെ കേന്ദ്രീകരിച്ച് അദ്ദേഹം സ്ലംഡോഗ് മില്യണയര് എന്ന പ്രശസ്ത സിനിമ നിര്മ്മിച്ചു. അത് നിരവധി അവാര്ഡുകള് നേടി. ദൈവം ഇച്ഛിച്ചാല് ധാരാവിയില് നിന്ന് നിരവധി കോടീശ്വരന്മാര് ഉയര്ന്നുവരുമെന്നും അതും സ്ലംഡോഗ് എന്ന് വിളിക്കപ്പെടാതെയെന്നും അദാനി കത്തില് സൂചിപ്പിച്ചു.
ധാരാവിയിലെ ജനങ്ങള്ക്ക് ലോകോത്തര നിലവാരത്തിലുള്ള ആശുപത്രിയും സ്കൂളും നല്കാനാകുമെന്ന് അദാനി പറഞ്ഞു . പുനര്വികസന പദ്ധതി പുനരധിവാസത്തില് മാത്രമല്ല ഉപജീവനമാര്ഗത്തിലും ശ്രദ്ധ കേന്ദ്രീകരിക്കുമെന്നും ഇതിനായി സംരംഭകത്വത്തെ പ്രോത്സാഹിപ്പിക്കുമെന്നും അദ്ദേഹം പറഞ്ഞു. നൈപുണ്യ വികസന അധിഷ്ഠിത പരിശീലന കേന്ദ്രം ഉള്പ്പെടെ സംരംഭകത്വത്തിന്റെ വിവിധ മാതൃകകള് പുതിയ ധാരാവിയില് സ്ഥാപിക്കുമെന്നും അദ്ദേഹം വ്യക്തമാക്കി.