ശ്രീജ.എസ്
ന്യൂഡല്ഹി: കോവിഡ് രോഗലക്ഷണങ്ങളില്ലാത്തവരും പരിശോധനയില് കോവിഡ് സ്ഥിരീകരിക്കുന്ന സാഹചര്യത്തില് വീട്ടില് ക്വാറന്റീനില് കഴിയുന്നതിനുള്ള പുതിയ മാര്ഗനിര്ദേശങ്ങളുമായി കേന്ദ്ര ആരോഗ്യ മന്ത്രാലയം. രോഗ ലക്ഷണങ്ങളില്ലാത്ത, പരിശോധനയില് രോഗം സ്ഥിരീകരിച്ച രോഗികളെയും നേരിയ ലക്ഷണങ്ങളുള്ളവരോ ലക്ഷണങ്ങള് പ്രകടമാകുന്ന അവസ്ഥക്ക് മുന്പുള്ള അവസ്ഥയുള്ളവരോ ആയവരെ രോഗികളുടെ പട്ടികയില് ഉള്പ്പെടുത്തും. ഇവര്ക്ക് ഹോം ക്വാറന്റീന് തെരഞ്ഞെടുക്കാം.
രക്താതിസമ്മര്ദം, പ്രമേഹം, ഹൃദ്രോഗം, ഗുരുതര ശ്വാസകോശ, കരള്, വൃക്ക മസ്തിഷ്ക സംബന്ധമായ അസുഖമുള്ളവര്ക്കും 60 വയസ്സിന് മുകളിലുള്ളവരുടെയും വീട്ടു ക്വാറന്റീന് ഡോക്ടറുടെ നിര്ദേശ പ്രകാരമായിരിക്കും. രോഗ ലക്ഷണം തുടങ്ങി 10 ദിവസത്തിനു ശേഷം രോഗികളെ വിട്ടയക്കും. ഇങ്ങനെ വിട്ടയക്കാന് ഇവര്ക്ക് മൂന്നു ദിവസമായി പനിയുണ്ടാകാന് പാടില്ല. അതിനുശേഷം പരിശോധനയുടെ ആവശ്യമില്ല. ശേഷം വരുന്ന ഏഴു ദിവസം കൂടി ഇവര് സ്വയം നിരീക്ഷിക്കണത്തില് പ്രവേശിക്കണം.
ക്വാറന്റീനില് പോകുന്നവര്ക്ക് വീട്ടില് ആവശ്യമായ സൗകര്യം ഉണ്ടാകണം. വീട്ടുക്വാറന്റീനിലുള്ള സമയത്ത് ആശുപത്രിയുമായി നിരന്തരം ബന്ധം സ്ഥാപിക്കാന് സാധിക്കുന്ന ഒരാള് സഹായിയായി വേണം. സഹായി ഉള്പ്പെടെ രോഗിയുമായി ഏതെങ്കിലും വിധത്തില് ബന്ധപ്പെടുന്നവര് ഡോക്ടറുടെ നിര്ദേശപ്രകാരം രോഗം പ്രതിരോധിക്കാനായി ഹൈഡ്രോ ക്ലോറോക്വിന് കഴിക്കണം. ആരോഗ്യസേതു ആപ് എല്ലാവരും ഡൗണ്ലോഡ് ചെയ്യണം. ഇത് എപ്പോഴും പ്രവര്ത്തിക്കുന്ന നിലയിലായിരിക്കണം. രോഗലക്ഷണങ്ങള് ഗുരുതരമായാല് ഉടന് സഹായം തേടണം.