തൃശൂര്: കുതിരാന് രണ്ടാം തുരങ്കം ഇന്ന് ഉച്ചയ്ക്ക് 12 മണിക്ക് പൊതുജനങ്ങള്ക്ക് സഞ്ചാരത്തിനായി തുറന്നു കൊടുക്കും. തൃശൂരില് നിന്നും പാലക്കാട്ടേക്കുള്ള വാഹനങ്ങളാണ് ഇതുവഴി കടത്തി വിടുക. അതോടെ ഒന്നാം തുരങ്കത്തിലെ രണ്ടു വരി ഗതാഗതം ഒഴിവാക്കി ഒറ്റ വരിയാക്കും. രണ്ടാം തുരങ്കത്തിന്റെ ചെറിയ ഭാഗമാണ് തുറന്നു കൊടുക്കുന്നത്. പ്രധാന അപ്രോച്ച് റോഡിന്റെ പണി ഇനിയും പൂര്ത്തിയാക്കാനുണ്ട്.
രണ്ടാം തുരങ്കം ഏപ്രില് അവസാനത്തോടെ ഗതാഗതത്തിന് തുറന്നുകൊടുക്കുമെന്നായിരുന്നു സംസ്ഥാന സര്ക്കാര് തീരുമാനിച്ചിരുന്നത്. എന്നാല്, തുരങ്കം സഞ്ചാരയോഗ്യമായ സാഹചര്യത്തിലാണ് തുറന്നു നല്കാമെന്ന നിര്ദേശം ദേശീയപാതാ അതോറിറ്റി നടത്തിയത്. തുരങ്കങ്ങള് തുറന്നു കൊടുത്താലും ടോള് പിരിവ് ഉടന് തുടങ്ങാന് സമ്മതിക്കില്ലെന്നാണ് സംസ്ഥാന സര്ക്കാരിന്റെ നിലപാട്. ‘രണ്ടാം തുരങ്കം പണി നടക്കുന്ന സമയത്ത് തുടര്ച്ചയായി മന്ത്രിമാര് പങ്കെടുത്ത് യോഗം നടത്തി സ്ഥിതി വിലയിരുത്തിയിരുന്നു. എന്നാല് ടണല് തുറക്കുന്നത് സംബന്ധിച്ചുള്ള കാര്യങ്ങള് നാഷണല് ഹൈവേ അതോറിറ്റി മന്ത്രിമാരെ അറിയിച്ചില്ല.” ടോള് പിരിവ് എന്ന വാര്ത്ത ദൗര്ഭാഗ്യകരമാണെന്നും മന്ത്രി റിയാസ് കുറ്റപ്പെടുത്തി.
കുതിരാന് ടണലിന്റെ ബാക്കിയുള്ള പണികളും തീര്ത്ത് പൂര്ണമായ പ്രവര്ത്തനം ഏപ്രില് അവസാനത്തോടെ തന്നെ ഉണ്ടാകുമെന്നും അദ്ദേഹം പറഞ്ഞു. പണികള് പൂര്ത്തിയാക്കാനുള്ളതിനാല് തുരങ്കത്തിന്റെ കുറച്ചു ഭാഗം തുറക്കുകയാണെന്നാണ് ഹൈവേ അതോറിറ്റി പറയുന്നത്. പൂര്ണമായി തുരങ്കം തുറന്ന് നല്കുന്നത് റോഡ് സുഗമമായി ഗതാഗതത്തിന് സജ്ജമായതിന് ശേഷം മാത്രമാകുമെന്നും മന്ത്രി കെ രാജനും പറഞ്ഞു.
944 മീറ്റര് നീളമുള്ള രണ്ടാം തുരങ്കത്തിന്റെ നിര്മ്മാണ പ്രവര്ത്തനങ്ങള് വളരെ വേഗത്തിലാണു പൂര്ത്തീകരിച്ചത്. 2021 ജൂലായ് 31നായിരുന്നു ഒന്നാം തുരങ്കം തുറന്നു നല്കിയത്. ഒന്നാം തുരങ്കത്തില് നിന്ന് വ്യത്യസ്തമായി രണ്ടാം തുരങ്കത്തിന്റെ ഉള്ഭാഗം മുഴുവനായി ഗ്യാന്ട്രി കോണ്ക്രീറ്റിംഗ് നടത്തിയിട്ടുണ്ട്. അര്ദ്ധവൃത്താകൃതിയിലുള്ള തുരങ്കങ്ങളാണ് കുതിരാനില് ഉള്ളത്.