പുഷ്പയിലെ അല്ലു അർജുൻ സ്റ്റൈലിൽ രക്തചന്ദനക്കടത്ത്

ബംഗളൂരു : തെലുങ്ക് സിനിമ സ്റ്റൈലിൽ രക്തചന്ദനം കടത്താൻ ശ്രമിക്കുന്നതിനിടെ ഒരാൾ അറസ്റ്റിൽ. അല്ലു അർജുൻ നായകനായ പുഷ്പ സിനിമയിലെ രംഗങ്ങൾ അനുകരിച്ചാണ് കടത്ത് നടത്തിയത്. സംഭവത്തിൽ യാസിൻ ഇനിയത്തുള്ള എന്നയാളാണ് പിടിയിലായത്. ആന്ധ്ര-കർണാടക അതിർത്തിയിൽ നിന്നും മഹാരാഷ്‌ട്രയിലേക്ക് കടത്തുന്നതിനിടെ ഗാന്ധി ചൗക്കിൽ വെച്ചാണ് മഹാരാഷ്‌ട്ര പോലീസ് ഇയാളെ അറസ്റ്റ് ചെയ്തത്.

2.45 കോടിയുടെ ഒരു ടൺ രക്തചന്ദനമാണ് ഇയാൾ കടത്താൻ ശ്രമിച്ചത് എന്ന് പോലീസ് പറയുന്നു. അനധികൃതമായി ചന്ദനമരം കടത്തുന്നുണ്ടെന്ന വിവരം ലഭിച്ചതിന്റെ അടിസ്ഥാനത്തിലാണ് അന്വേഷണം നടത്തിയത്. യാസിന്റെ ട്രക്ക് പിടിച്ചെടുത്ത് നടത്തിയ പരിശോധനയിലാണ് ഞെട്ടിക്കുന്ന കണ്ടെത്തലുകൾ പുറത്ത് വന്നത്.

രക്തചന്ദനം താഴെ വെച്ച് അതിന്റെ മുകളിൽ പഴങ്ങളും പച്ചക്കറിയും നിറച്ചാണ് ഇയാൾ കടത്താൻ ശ്രമിച്ചത് എന്ന് പോലീസ് പറയുന്നു. 10 ലക്ഷത്തിന്റെ ട്രക്കും പിടിച്ചെടുത്തിട്ടുണ്ട്. കർണാടക അതിർത്തി ഇയാൾ അനായാസമായി കടന്നെങ്കിലും മഹാരാഷ്‌ട്രയിൽ വെച്ചാണ് പിടികൂടിയത്. സംഭവത്തിൽ പോലീസ് അന്വേഷണം വ്യാപിപ്പിച്ചിരിക്കുകയാണ്.