ഹിമാലയൻ മലനിരകള്‍ പോലും വരള്‍ച്ചയുടെ വക്കിലെത്തും

ഹിമാലയൻ മലനിരകള്‍ പോലും വരള്‍ച്ചയുടെ വക്കിലത്തുമെന്ന് മുന്നറിയിപ്പ്. ആഗോളതാപനം 3 ഡിഗ്രി സെല്‍ഷ്യസ് വർദ്ധിച്ചാല്‍ ഹിമാലയൻ മലനിരകളുടെ 90 ശതമാനവും വരള്‍ച്ചയ്ക്ക് സാക്ഷ്യം വഹിക്കേണ്ടി വരും. യുകെയിലെ ഈസ്റ്റ് ആംഗ്ലിയ സർവകലാശാലയിലെ ഗവേഷകരുടെ നേതൃത്വത്തിലുള്ള സംഘമാണ് ഇത് സംബന്ധിച്ച റിപ്പോർട്ട് തയ്യാറാക്കിയത്. കാലാവസ്ഥ വ്യതിയാനങ്ങളെ കുറിച്ചുള്ള ജേർണലില്‍ ഇത് സംബന്ധിച്ച വിവരങ്ങള്‍ പങ്കുവെച്ചിട്ടുണ്ട്.

ആഗോളതാപനത്തിന്റെ തോത് വർദ്ധിക്കുന്നതിനനുസരിച്ച്‌ മനുഷ്യർക്കും പ്രകൃതിദത്ത സംവിധാനങ്ങള്‍ക്കും കാലാവസ്ഥാ വ്യതിയാന അപകടസാധ്യതകള്‍ ഉണ്ടാകുന്നതാണ്. വിവിധ മാർഗങ്ങളിലൂടെ ആഗോളതാപനം 1.5 ഡിഗ്രി സെല്‍ഷ്യസായി പരിമിതപ്പെടുത്തേണ്ടതുണ്ട്. എന്നാല്‍, ഇതിന് വിപരീതമായി താപനില ഉയരുന്നത് വലിയ പ്രത്യാഘാതങ്ങള്‍ സൃഷ്ടിച്ചേക്കാം.

ഇന്ത്യ, ബ്രസീല്‍, ചൈന, ഈജിപ്ത്, എത്യോപ്യ, ഘാന എന്നിവിടങ്ങളില്‍ നടത്തിയ പഠനങ്ങളുടെ അടിസ്ഥാനത്തിലാണ് അന്തിമ റിപ്പോർട്ട് തയ്യാറാക്കിയിരിക്കുന്നത്, ആഗോളതാപനത്തിന്റെ അളവ് കൂടുന്നതിനനുസരിച്ച്‌ വരള്‍ച്ച, വെള്ളപ്പൊക്കം, വിളവ് കുറയല്‍, ജൈവവൈവിധ്യത്തിന്റെ നഷ്ടം എന്നീ അപകടസാധ്യതകള്‍ ഉടലെടുക്കുന്നതാണ്. ആഗോളതാപനം കുറയ്ക്കാൻ കൂടുതല്‍ ശ്രമങ്ങള്‍ ആവശ്യമാണെന്ന് ഗവേഷകർ വ്യക്തമാക്കി.