ബുര്‍ക്കിന ഫാസോയുടെ പുതിയ പ്രസിഡന്റായി ചുമതലയേറ്റ് ഇബ്രാഹിം ട്രറോര്‍

വാഗഡുഗു: ബുര്‍ക്കിന ഫാസോയുടെ പുതിയ പ്രസിഡന്റായി ക്യാപ്റ്റന്‍ ഇബ്രാഹിം ട്രറോറിനെ നിയമിച്ചു. സായുധ സേനയുടെ പരമോന്നത തലവനായി ഇബ്രാഹിം ട്രറോറിനെ നിയമിച്ചുവെന്ന ഔദ്യോഗിക പ്രസ്താവനയും രാജ്യം പുറത്തിറക്കിയിട്ടുണ്ട്.
സെപ്തംബര്‍ 30നാണ് പ്രസിഡന്റ് പോള്‍-ഹെന്റി ഡാമിബയെ ഇബ്രാഹിം ട്രറോറിന്റെ നേതൃത്വത്തിലുള്ള സൈനിക സംഘം പുറത്താക്കിയത്. പിന്നാലെയാണ് ട്രറോര്‍ ചുമതലയേറ്റെടുത്തത്. രാജ്യത്ത് നടന്ന സായുധ കലാപത്തെ നേരിടാന്‍ ഡാമിബയ്‌ക്ക് കഴിഞ്ഞില്ലെന്ന് ആരോപിച്ചാണ് ഇത്തരമൊരു നീക്കം നടത്തിയതെന്ന് ട്രറോര്‍ ആരോപിച്ചു.
ചുമതലയേറ്റതിന് പിന്നാലെ ട്രറോര്‍ രാജ്യത്തെ അഭിസംബോധന ചെയ്തിരുന്നു. ഇക്കഴിഞ്ഞ ജനുവരി 24ന് അട്ടിമറി ഭരണത്തിലൂടെയാണ് ഡാമിബയും ബുര്‍ക്കിനോ ഫാസോയില്‍ അധികാരം പിടിച്ചെടുത്തത്. പ്രസിഡന്റായിരുന്ന റോച്ച്‌ കബോറിനെയാണ് ദമീബയുടെ നേതൃത്വത്തിലുളള സൈന്യം പുറത്താക്കിയത്. കഴിഞ്ഞ ആറ് വര്‍ഷമായി രാജ്യത്തിന്റെ പ്രസിഡന്റായിരുന്നു കബോര്‍.