![“Manju”](https://santhigirinews.org/wp-content/uploads/2020/04/YOUTUBE.jpg")
ശ്രീജ.എസ്
കൊച്ചി: സംസ്ഥാനത്തെ സിബിഎസ്‌ഇ സ്കൂളുകളുടെ ഫീസ് നിര്‍ണയ മാനദണ്ഡം സംബന്ധിച്ച്‌ ഹൈക്കോടതി സിബിഎസ്‌ഇയോട് നിലപാട് തേടി. സ്‌കൂള്‍ ഫീസ് നിര്‍ണയത്തില്‍ തങ്ങളുടെ അധികാര പരിധി വ്യക്തമാക്കി സിബിഎസ്‌ഇ കൃത്യമായ വിശദീകരണം നല്‍കാന്‍ ഹൈക്കോടതി നിര്‍ദേശം നല്‍കി.
ഫീസടച്ചില്ലെന്ന കാരണത്താല്‍ കുട്ടികളെ ഓണ്‍ലൈന്‍ ക്ലാസുകളില്‍നിന്നു പുറത്താക്കുന്നെന്നാരോപിച്ച്‌ ആലുവ മണലിമുക്ക് സെന്‍റ് ജോസഫ്സ് പബ്ലിക് സ്‌കൂളിലെ ഏഴു കുട്ടികളുടെ രക്ഷിതാക്കള്‍ നല്‍കിയ ഹര്‍ജിയിലാണ് സിംഗിള്‍ ബെഞ്ച് നിര്‍ദേശം. ഹര്‍ജി 28നു പരിഗണിക്കാന്‍ മാറ്റി. ഫീസ് അടയ്ക്കാത്തതിന്റെ പേരില്‍ കുട്ടികളെ ക്ലാസില്‍നിന്നു പുറത്താക്കരുതെന്ന ഇടക്കാല ഉത്തരവിന്‍റെ കാലാവധി ഹൈക്കോടതി നീട്ടിയിട്ടുണ്ട്.
കോവിഡ് പശ്ചാത്തലത്തില്‍ പ്രതിസന്ധി നേരിടുന്ന സ്ക്കുളുകള്‍ക്ക് വിദ്യാഭ്യാസ അവകാശ നിയമപ്രകാരം സാമ്പത്തിക സഹായം നല്‍കാന്‍ നിര്‍ദേശിക്കണമെന്ന ഹര്‍ജിയില്‍ കേന്ദ്ര-സംസ്ഥാന സര്‍ക്കാരുകളോട് വിശദമായ സത്യവാങ്ങ്മൂലം സമര്‍പ്പിക്കാന്‍ ഹൈക്കോടതി ചൊവ്വാഴ്ച നിര്‍ദേശം നല്‍കിയിരുന്നു. ഏത് സര്‍ക്കാരാണ് സഹായം നല്‍കേണ്ടതെന്നും അറിയിക്കണം.
