മുംബൈ: മുംബൈയില് അനധികൃതമായി 2.7 കോടി രൂപ വിലവരുന്ന തിമിംഗല ഛര്ദി അഥവാ ആംബര്ഗ്രിസ് വില്ക്കാന് ശ്രമിച്ച മൂന്നുപേര് പിടിയില്. മുലുന്ദില് ബുധനാഴ്ചയാണ് സംഭവം നടന്നത്. രഹസ്യ വിവരത്തിന്റെ അടിസ്ഥാനത്തില് ക്രൈംബ്രാഞ്ചും വനം വകുപ്പ് ഉദ്യോഗസ്ഥരും നടത്തിയ റെയ്ഡിലാണ് 2.7 കിലോ വരുന്ന തിമിംഗല ഛര്ദി പ്രതികളില് നിന്ന് പിടികൂടിയത്. കൂടുതല് പരിശോധനക്കായി തിമിംഗല ഛര്ദിയുടെ സാമ്പിളുകള് മറൈന് ബയോളജിസ്റ്റിലേക്ക് അയച്ചു.
വന്യജീവി സംരക്ഷണ നിയമപ്രകാരം സംരക്ഷിക്കപ്പെടുന്ന ഒന്നാണ് ആംബര്ഗ്രിസ്. പെര്ഫ്യൂം നിര്മിക്കുന്നതിന് വ്യാപകമായി ഇവ ഉപയോഗിച്ചിരുന്നു. പിന്നീട് ഇവയുടെ ഉപയോഗം നിരോധിച്ചു. കടലിലെ നിധി, ഒഴുകുന്ന സ്വര്ണം എന്നിങ്ങനെയാണ് സ്പേം തിമിംഗലങ്ങളുടെ ഛര്ദി അറിയപ്പെടുന്നത്. തിമിംഗലത്തിന്റെ സ്രവമാണിത്. തിമിംഗലം ഛര്ദിക്കുമ്പോള് ആദ്യം ദ്രവമായിട്ടാണ് ഇവ കാണുക. പിന്നീട് ഖരരൂപത്തിലാകും. രൂക്ഷമായ ഗന്ധവും ഇതിനുണ്ടാകും.