ന്യൂഡല്ഹി: കള്ളപ്പണം വെളുപ്പിക്കലുമായി ബന്ധപ്പെട്ട് സൂറത്തിലെ ബി.ജെ.പി മുന് നേതാവിന്റെ എട്ടു കോടി രൂപയുടെ സ്വത്തുക്കള് ഇ.ഡി കണ്ടുകെട്ടി. കള്ളപ്പണം വെളുപ്പിക്കല് തടയല് നിയമപ്രകാരം പി.വി.എസ്. സാമ, ഭാര്യ അന്നപൂര്ണ, മകന് പി. സുശാന്ത് സാമ എന്നിവര്ക്കും അദ്ദേഹത്തിന്െറ മാധ്യമ സ്ഥാപനമായ സങ്കേത് മീഡിയക്കുമെതിരെയാണ് കണ്ടുെകട്ടല് ഉത്തരവ് നല്കിയതെന്ന് ഇ.ഡി അറിയിച്ചു. 2.7 കോടി രൂപ വിലവരുന്ന സ്ഥാവര, ജംഗമ സ്വത്തുക്കളുടെ വിപണിവില എട്ടു കോടി വരും. ബി.ജെ.പിയുടെ സൂറത്ത് വൈസ് പ്രസിഡന്റായിരുന്ന സാമയെ പാര്ട്ടി കഴിഞ്ഞ ഒക്ടോബറില് പുറത്താക്കിയിരുന്നു. കള്ളപ്പണം വെളുപ്പിക്കല് തടയല് നിയമപ്രകാരം കഴിഞ്ഞ നവംബര് മുതല് സാമ ഇ.ഡി കസ്റ്റഡിയിലാണ്.