തിരുവനന്തപുരം : വിദ്യാഭ്യാസ വകുപ്പുമായി സഹകരിച്ച് ഒക്ടോബര് ഒന്നു മുതല് ഡിസംബര് പത്തു വരെ കുടുംബശ്രീയുടെ നേതൃത്വത്തില് ‘തിരികെ സ്കൂളില്’ സംസ്ഥാനതല ക്യാമ്പെയ്ന് സംഘടിപ്പിക്കുന്നു. ഇതിന്റെ ഭാഗമായി അയല്ക്കൂട്ട വനിതകള് വീണ്ടും പഠിതാക്കളായി വിദ്യാലയങ്ങളിലേക്കെത്തും. കുടുംബശ്രീ ത്രിതല സംഘടനാ സംവിധാനത്തെ കൂടുതല് മെച്ചപ്പെടുത്തുന്നതിന്റെ ഭാഗമായാണിത്. ഓരോ സി.ഡി.എസിനു കീഴിലുമുള്ള വിദ്യാലയങ്ങളിലാണ് അയല്ക്കൂട്ടങ്ങള് പങ്കെടുക്കുക. അവധി ദിനങ്ങളില് സംഘടിപ്പിക്കുന്ന ക്യാമ്പെയ്നു വേണ്ടി സംസ്ഥാനത്ത് രണ്ടായിരത്തിലേറെ സ്കൂളുകള് വിദ്യാഭ്യാസ വകുപ്പ് അനുവദിച്ചിട്ടുണ്ട്.
സ്ത്രീശാക്തീകരണവുമായി ബന്ധപ്പെട്ട് നാളിതു വരെ സംഘടിപ്പിച്ചതില് ഏറ്റവും ബൃഹത്തായ ക്യാമ്പെയ്നായിരിക്കും ‘തിരികെ സ്കൂളില്’. വിജ്ഞാന സമ്പാദനത്തിന്റെ ഭാഗമായി 46 ലക്ഷം അയല്ക്കൂട്ട വനിതകള് പഠിതാക്കളായി എത്തുന്നു എന്നതാണ് ക്യാമ്പെയ്ന്ന്റെ സവിശേഷത.