നെടുങ്കണ്ടം കസ്റ്റഡി മരണം; കുറ്റപത്രം സമർപ്പിച്ച് സിബിഐ

ഇടുക്കി : നെടുങ്കണ്ടം കസ്റ്റഡി മരണക്കേസിൽ കുറ്റപത്രം സമർപ്പിച്ച് സിബിഐ. നെടുങ്കണ്ടം എസ്‌ഐയുൾപ്പെടെ ഒൻപത് പോലീസുകാർക്കെതിരെ എറണാകുളം സിജെഎം കോടതിയിലാണ് കുറ്റപത്രം സമർപ്പിച്ചത്. സംഭവം നടന്ന് ഏഴ് മാസം പൂർത്തിയാകുമ്പോഴാണ് അന്വേഷണ സംഘം കുറ്റപത്രം സമർപ്പിക്കുന്നത്.

കുറ്റം മറയ്ക്കാൻ പ്രതികൾ ചേർന്ന് വ്യാജ തെളിവുകൾ ഉണ്ടാക്കി. അന്നത്തെ ഇടുക്കി എസ്.പി വേണുഗോപാൽ, ഡിവൈഎസ്പി ഷംസുദ്ദീൻ, ജയിൽ ഉദ്യോഗസ്ഥർ, ഡോക്ടർമാർ എന്നിവർക്കെതിരായ അന്വേഷണം തുടരുകയാണെന്നും കുറ്റപത്രത്തിൽ വ്യക്തമാക്കുന്നു.

നേരത്തെ കേസ് അന്വേഷിച്ച ക്രൈംബ്രാഞ്ച് ഏഴ് പോലീസുകാരെയാണ് പ്രതിപ്പട്ടികയിൽ ഉൾപ്പെടുത്തിയിരുന്നത്. എന്നാൽ സിബിഐ ഒരു ഹെഡ് കോൺസ്റ്റബിളിനെയും, വനിതാ പോലീസിനെയും അധികമായി പ്രതിചേർക്കുകയായിരുന്നു.