ഡല്ഹി: രാജ്യത്തുടനീളം കൊവിഡ് കേസുകള് വര്ദ്ധിക്കുന്ന ഈ സമയത്ത് കൊവിഡ് പോസിറ്റീവായ വിദ്യാര്ത്ഥികള്ക്ക് ആശ്വാസവുമായി സിബിഎസ്ഇ. രോഗം സ്ഥിരീകരിച്ച വിദ്യാര്ത്ഥികള്ക്കായി സെന്ട്രല് ബോര്ഡ് ഓഫ് സെക്കന്ഡറി എജ്യുക്കേഷന് (സിബിഎസ്ഇ) ഒരു വലിയ പ്രഖ്യാപനം നടത്തി. അറിയിപ്പ് അനുസരിച്ച്, ഒരു വിദ്യാര്ത്ഥി കൊവിഡ് പോസിറ്റീവാണെങ്കില് അവര് ലബോറട്ടറിയിലെ പ്രാക്ടിക്കല് പരീക്ഷകളെ കുറിച്ച് ഓര്ത്ത് വിഷമിക്കേണ്ടതില്ല.
ഇതുസംബന്ധിച്ച വിജ്ഞാപനം പുറപ്പെടുവിച്ച സിബിഎസ്ഇ, അത്തരം വിദ്യാര്ത്ഥികള്ക്കുള്ള പ്രായോഗിക പരീക്ഷകള് ഒന്നുകില് മാറ്റിവയ്ക്കുമെന്നും അല്ലെങ്കില് ഏപ്രിലില് എഴുത്തു പരീക്ഷകള് കഴിഞ്ഞ ശേഷമോ നടത്തുമെന്നും വ്യക്തമാക്കി. സി.ബി.എസ്.ഇ സര്ക്കുലര് അനുസരിച്ച് കോവിഡ് ബാധിച്ച വിദ്യാര്ത്ഥികള്ക്ക് വിശ്രമിക്കാനും വീട്ടില് നിരീക്ഷണത്തില് തുടരാനും നിര്ദ്ദേശമുണ്ട്. കൂടാതെ, ഏതെങ്കിലും വിദ്യാര്ത്ഥി കൊവിഡ് പോസിറ്റീവാകുകയും പ്രായോഗിക പരീക്ഷയ്ക്ക് ഹാജരാകാന് കഴിയാതിരിക്കുകയും ചെയ്താല് അത്തരം വിദ്യാര്ത്ഥികള്ക്കുള്ള പ്രായോഗിക പരീക്ഷകള് പിന്നീടുള്ള തീയതിയില് നടത്താമെന്ന് സിബിഎസ്ഇ പറഞ്ഞു.
ഈ തീരുമാനം മാതാപിതാക്കള്ക്കും വിദ്യാര്ത്ഥികള്ക്കും ആശ്വാസമാകുമെന്ന് അധികൃതര് വ്യക്തമാക്കി. സിബിഎസ്ഇ ബോര്ഡ് പ്രായോഗിക പരീക്ഷകള് ആരംഭിച്ച സമയത്താണ് കൊറോണ വൈറസ് കേസുകള് വീണ്ടും ഉയര്ന്നത്. ഇത് ആശങ്കയ്ക്ക് ഇടയാക്കിയിരുന്നു. കൊല്ക്കത്തയിലെ പല സ്കൂളുകളും പന്ത്രണ്ടാം ക്ലാസ് ബോര്ഡ് പ്രാക്ടിക്കലുകള് ആരംഭിച്ചു.