കോവിഡ്​ രോഗികള്‍ക്ക്​ ടെലി കണ്‍സ​ല്‍​ട്ടേഷനുമായി ആസ്​റ്റര്‍

ദുബൈ: ഇന്ത്യയിലെ കോവിഡ്​ രോഗികള്‍ക്കും പരിചരിക്കുന്നവര്‍ക്കും ടെലി കണ്‍സല്‍​ട്ടേഷന്‍ സേവനവുമായി ആസ്​റ്റര്‍ ഡി.എം ഹെല്‍ത്ത്​കെയര്‍. ജി.സി.സി രാജ്യങ്ങളിലെ നൂറിലധികം ആസ്​റ്റര്‍ ഡോക്​ടര്‍മാരുടെ സേവനമാണ്​ ഉപയോഗപ്പെടുത്തുക. ആസ്​റ്ററിന്റെ ആഗോള സി.എസ്.ആര്‍ മുഖമായ ആസ്​റ്റര്‍ വളന്‍റിയേഴ്‌സ് മുഖേനയായിരിക്കും സേവനം ഏകോപിക്കുക.
മഹാമാരിയെക്കുറിച്ച തെറ്റായ വിവരങ്ങള്‍ വ്യാപിക്കുന്നത് ആശയക്കുഴപ്പത്തിനും ഉത്കണ്ഠക്കും കാരണമാകുന്നതിനാല്‍ രോഗികള്‍ക്കൊപ്പം പരിചരിക്കുന്നവര്‍ക്കും ഹെല്‍പ്​ലൈന്‍ ഉപയോഗിക്കാം. രോഗത്തെക്കുറിച്ച സംശയങ്ങള്‍ക്ക് ഈ സംവിധാനത്തിലൂടെ മറുപടി ലഭ്യമാകും. നേരിട്ടുള്ള വിഡിയോ കണ്‍സല്‍ട്ടേഷനുമുണ്ട്​. ഞായര്‍ മുതല്‍ വ്യാഴം വരെ ഇന്ത്യന്‍ സമയം ഉച്ചക്ക് 1.30 മുതല്‍ വൈകീട്ട് 5.30 വരെ സേവനം ലഭിക്കും. ഈ സമയത്ത് രോഗികള്‍ക്കും പൊതുജനങ്ങള്‍ക്കും ലളിതവും ആധികാരികവുമായ മാര്‍ഗനിര്‍ദേശം പ്രധാനമാണെന്ന് ആസ്​റ്റര്‍ ഡി.എം ഹെല്‍ത്ത് കെയര്‍ സ്ഥാപക ചെയര്‍മാനും മാനേജിങ് ഡയറക്ടറുമായ ഡോ. ആസാദ് മൂപ്പന്‍ പറഞ്ഞു.
ധാരാളം ആളുകള്‍ നേരിട്ട് ആരോഗ്യ സംരക്ഷണ സ്ഥാപനങ്ങളിലെത്തുന്നത്​ നിലവിലുള്ള സംവിധാനങ്ങളെ പ്രതിസന്ധിയിലാക്കും. വീടുകളില്‍ കഴിഞ്ഞുകൊണ്ട് ടെലി കണ്‍സല്‍ട്ടേഷനിലൂടെ ശരിയായ ഉപദേശം ലഭ്യമാക്കുന്നതിലൂടെ ഈ സാഹചര്യം ഒഴിവാക്കാന്‍ കഴിയുമെന്നും അദ്ദേഹം വ്യക്​തമാക്കി.’ഓരോ പൗരനും ഒരു ഡോക്ടര്‍’ എന്ന യു.എ.ഇ വൈസ്​ പ്രസിഡന്‍റും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിന്‍ റാശിദ്​ ആല്‍ മക്​തൂമി​െന്‍റ വീക്ഷണത്തെ പിന്തുണച്ചുകൊണ്ടാണ് ടെലി ഹെല്‍ത്ത് സേവനങ്ങള്‍ ആദ്യമായി ആരംഭിച്ചതെന്ന് ആസ്​റ്റര്‍ ഡി.എം ഹെല്‍ത്ത് കെയര്‍ ഡെപ്യൂട്ടി മാനേജിങ് ഡയറക്ടര്‍ അലീഷ മൂപ്പന്‍ പറഞ്ഞു.
ഇന്‍റര്‍നെറ്റില്‍നിന്നുള്ള ആധികാരികമല്ലാത്ത പല ഉപദേശങ്ങളും വിപരീതഫലങ്ങള്‍ സൃഷ്​ടിക്കുന്നുണ്ടെന്നും ടെലി കണ്‍സല്‍​ട്ടേഷന്‍ സേവനം ഇതിന്​ പരിഹാരമാകുമെന്ന്​ പ്രതീക്ഷിക്കുന്നതായും ആസ്​റ്റര്‍ ഡി.എം ഹെല്‍ത്ത് കെയര്‍ ഇന്ത്യ-സി.ഇ.ഒ ഡോ. ഹരീഷ് പിള്ള പറഞ്ഞു.
ടെലി കണ്‍സല്‍​ട്ടേഷന്‍ സേവനം ഉപയോഗിക്കാന്‍
താഴെ പറയുന്ന URLല്‍ ലോഗിന്‍ ചെയ്താല്‍ ഈ സേവനം ലഭ്യമാകും. URL: Covid Helpline | Aster Covid Helpline (asterdmhealthcare.com). അല്ലെങ്കില്‍ Aster e-Consult app ഡൗണ്‍ലോഡുചെയ്ത് Covid Helpline സെലക്‌ട് ചെയ്യാം.