ന്യൂഡല്ഹി: കോവിഡ് പ്രതിരോധ വാക്സീന്റെ വില കുറയ്ക്കണമെന്ന് കമ്പനികളോട് ആവശ്യപ്പെട്ട് കേന്ദ്ര സര്ക്കാര്. സെറം ഇന്സ്റ്റിറ്റ്യൂട്ട് ഓഫ് ഇന്ത്യയോടും ഭാരത് ബയോടെക്കിനോടുമാണ് വില കുറയ്ക്കാന് ആവശ്യപ്പെട്ടതെന്ന് പിടിഐ റിപ്പോര്ട്ട് ചെയ്തു. വാക്സീന്റെ വിലയെച്ചൊല്ലി വിവാദങ്ങള് ഉയര്ന്ന പശ്ചാത്തലത്തിലാണ് വില കുറയ്ക്കണമെന്ന് കേന്ദ്രം ആവശ്യപ്പെട്ടത്.
നിലവില് രാജ്യത്ത് കോവിഷീല്ഡ്, കോവാക്സിന് എന്നിങ്ങനെ രണ്ട് വാക്സിനുകളാണ് ഉത്പാദിപ്പിക്കുന്നത്. ഐസിഎംആര് സഹകരണത്തോടെ ഭാരത് ബയോടെക്കാണ് കോവാക്സിന് ഉത്പാദിപ്പിക്കുന്നത്. സെറം ഇന്സ്റ്റിറ്റ്യൂട്ടാണ് കോവിഷീല്ഡ് വാക്സിന് രാജ്യത്ത് നിര്മിക്കുന്നത്.
കോവിഷീല്ഡ് വാക്സീന് സംസ്ഥാന സര്ക്കാരുകള്ക്ക് ഡോസിന് 400 രൂപ നിരക്കിലും സ്വകാര്യ ആശുപത്രികള്ക്ക് 600 രൂപ നിരക്കിലും നല്കുമെന്ന് കഴിഞ്ഞ ദിവസം പ്രഖ്യാപിച്ചിരുന്നു. സംസ്ഥാന സര്ക്കാരുകള്ക്ക് ഡോസിന് 600 രൂപ നിരക്കിലും സ്വകാര്യ ആശുപത്രികള്ക്ക് ഡോസിന് 1200 രൂപ നിരക്കിലും വാക്സീന് വിതരണം ചെയ്യുമെന്ന് ഭാരത് ബയോടെകും അറിയിച്ചിരുന്നു.
എന്നാല് വാക്സിനുകള്ക്ക് ഉയര്ന്ന വില നിശ്ചയിച്ചതിനെതിരേ പ്രതിപക്ഷ പാര്ട്ടികള് അടക്കം രംഗത്ത് വരികയും വിവിധ കോണുകളില് നിന്ന് വിമര്ശനം ഉയരുകയും ചെയ്തു. കാബിനറ്റ് സെക്രട്ടറി രാജീവ് ഗൗബയുടെ അധ്യക്ഷതയില് ചേര്ന്ന യോഗത്തില് വാക്സീന് വില നിര്ണ്ണയം സംബന്ധിച്ച വിഷയം ചര്ച്ച ചെയ്തിരുന്നു.