മൂന്നാര്: നായെ ചൊല്ലിയുള്ള അയല്വാസികളുടെ വഴക്കിനിടെ മധ്യസ്ഥതക്ക് ശ്രമിച്ച തോട്ടം തൊഴിലാളിയായ യുവാവിന്റെ ചെവി വെട്ടിമാറ്റി. ചെണ്ടുവരൈ എസ്റ്റേറ്റ് ചിട്ടിവാര ഡിവിഷനിലെ രാജിനാണ് (34) വെട്ടേറ്റത്.തിങ്കളാഴ്ച രാത്രി ഒമ്പതോടെയാണ് സംഭവം.ചിട്ടിവാര ഡിവിഷനിലെ എട്ടുമുറി ലയത്തില്തന്നെ താമസക്കാരനായ പളനിയാണ് (54) പ്രതി. ഇയാളുടെ വളര്ത്തുനായ് രാജാമണിയുടെ വീട്ടുമുറ്റത്ത് വിസര്ജിച്ചതുമായി ബന്ധപ്പെട്ട് ഇരുവരും തമ്മില് വഴക്കുണ്ടാക്കി. ബഹളം കേട്ട് വീട്ടില്നിന്ന് പുറത്തിറങ്ങിയ രാജ് ഇരുവരെയും സമാധാനിപ്പിച്ചു.അല്പം കഴിഞ്ഞ് വീണ്ടും വഴക്ക് തുടങ്ങിയപ്പോള് രണ്ടുപേരെയും പിന്തിരിപ്പിച്ച് അവരവരുടെ വീടുകളിലേക്ക് കയറ്റിവിട്ടു. ഈ സമയം തേയിലച്ചെടി മുറിക്കുന്ന നീളമുള്ള കത്തിയുമായി പളനി പുറത്തുവരുകയും രാജിന്റെ കഴുത്തിനുനേരെ വെട്ടുകയുമായിരുന്നു. പെട്ടെന്ന് പിന്നോട്ട് മാറിയെങ്കിലും ചെവിക്കും കഴുത്തിനും വെട്ടേറ്റു. ഇടതുചെവി മുറിഞ്ഞ് താഴെ വീണു.
അയല്വാസികള് ചേര്ന്ന് മൂന്നാറിലെ ടാറ്റ ജനറല് ആശുപത്രിയില് എത്തിച്ചപ്പോഴാണ് ചെവി നഷ്ടമായ വിവരം അറിയുന്നത്. ഉടന് നാട്ടുകാര് തിരിച്ചെത്തി മുറ്റത്ത് കിടന്ന ചെവിയുമായി ആശുപത്രിയില് എത്തിയെങ്കിലും തുന്നിച്ചേര്ക്കാന് കഴിയില്ലെന്നായിരുന്നു ആശുപത്രി അധികൃതരുടെ മറുപടി.ആക്രമണത്തിനുശേഷം കടന്നുകളയാന് ശ്രമിച്ച പളനിയെ നാട്ടുകാര് വീട്ടിനുള്ളില് തടഞ്ഞുവെച്ച് പൊലീസില് അറിയിക്കുകയായിരുന്നു. അര്ധരാത്രിയോടെ സ്ഥലത്തെത്തിയ മൂന്നാര് എസ്.ഐ ടി.എം. സൂഫിയുടെ നേതൃത്വത്തിലെ പൊലീസ് സംഘം ഇയാളെ അറസ്റ്റ് ചെയ്തു