സിക്ക വൈറസ് പരിശോധന നടത്താന് കേരളം പൂര്ണസജ്ജം; ആരോഗ്യമന്ത്രി
തിരുവനന്തപുരം: സിക്ക വൈറസ് പരിശോധന നടത്താന് കേരളം പൂര്ണസജ്ജമായെന്ന് ആരോഗ്യമന്ത്രി വീണാ ജോര്ജ് പറഞ്ഞു. തിരുവനന്തപുരം, തൃശ്ശൂര്, കോഴിക്കോട് മെഡിക്കല് കോളേജുകള്, ആലപ്പുഴ എന്ഐവി യൂണിറ്റ് എന്നിവിടങ്ങളില് ആദ്യഘട്ടമായി സിക്ക വൈറസ് പരിശോധനകള് നടത്തും. എന്ഐവി പൂനയില് നിന്നും വൈറസ് പരിശോധന നടത്താന് കഴിയുന്ന 2100 പിസിആര് കിറ്റുകള് ലഭ്യമാക്കിയിട്ടുണ്ട്.
തിരുവനന്തപുരം 1000, തൃശൂര് 300, കോഴിക്കോട് 300, ആലപ്പുഴ എന്ഐവി 500 എന്നിങ്ങനെയാണ് ടെസ്റ്റ് കിറ്റുകള് ലഭിച്ചത്. തിരുവനന്തപുരം മെഡിക്കല് കോളേജിന് ഡെങ്കിപ്പനി, ചിക്കന്ഗുനിയ, സിക്ക എന്നിവ പരിശോധിക്കാന് കഴിയുന്ന 500 ട്രയോപ്ലക്സ് കിറ്റുകളും സിക്ക വൈറസ് മാത്രം പരിശോധിക്കാന് കഴിയുന്ന 500 സിങ്കിള് പ്ലക്സ് കിറ്റുകളുമാണ് ലഭിച്ചിരിക്കുന്നത്. മറ്റ് മൂന്ന് ലാബുകളില് സിക്ക പരിശോധിക്കാന് കഴിയുന്ന സിങ്കിള് പ്ലക്സ് കിറ്റുകളാണ് ലഭിച്ചതെന്നും മന്ത്രി പറഞ്ഞു.