ന്യൂഡെല്ഹി: ജനസംഖ്യയില് ഏറ്റവും കൂടുതല് വൃദ്ധരുള്ള സംസ്ഥാനം കേരളമാണെന്ന് റിപ്പോര്ട്ട്. കേന്ദ്രം പുറത്തുവിട്ട 2021 ലെ കണക്കനുസരിച്ച് കേരളത്തിലെ ജനസംഖ്യയുടെ 16.5 ശതമാനം വൃദ്ധരാണ്. തമിഴ്നാട് (13.6%), ഹിമാചല് പ്രദേശ് (13.1%), പഞ്ചാബ് (12.6%), ആന്ധ്ര (12.4%) എന്നിങ്ങനെയാണ് കണക്ക്. ഏറ്റവും കുറവ് വൃദ്ധരുള്ളത് ബീഹാറിലാണ്. ജനസംഖ്യയുടെ 7.7 ശതമാനാമാണ് ഇവിടുത്തെ കണക്ക്. തൊട്ടുമുന്പില് ഉത്തര്പ്രദേശ് (8.1%), അസം (8.2%) എന്നീ സംസ്ഥാനങ്ങളാണ്.
ഇന്ത്യയിലെയും സംസ്ഥാനങ്ങളിലെയും ജനസംഖ്യാ പ്രവചനങ്ങളെക്കുറിച്ച് പഠിക്കുന്ന സാങ്കേതിക സംഘമാണ് ഇത് സംബന്ധിച്ച് സര്വേ നടത്തിയത്. ഇതനുസരിച്ച് 2031 ല് കേരളത്തിലെ ജനസംഖ്യയുടെ 20.9 ശതമാനം വൃദ്ധരായിരിക്കും. തമിഴ്നാട് (18.2%), ഹിമാചല് പ്രദേശ് (17.1%), ആന്ധ്രാപ്രദേശ് (16.4%), പഞ്ചാബ് (16.2%) എന്നിങ്ങനെയായിരിക്കും കണക്കുകള്.
1961 മുതല് 1981 വരെയുള്ള കാലഘട്ടത്തില് സമാനമായ പഠനങ്ങള് നടന്നിരുന്നു. സാമ്പത്തിക സ്ഥിതി, മെച്ചപ്പെട്ട ആരോഗ്യ പരിരക്ഷ, മെഡിക്കല് സൗകര്യങ്ങള് തുടങ്ങിയ കാരണങ്ങളാണ് വൃദ്ധരുടെ ആയുര് ദൈര്ഘ്യം കൂട്ടുന്നതിന് കാരണങ്ങളായി ചൂണ്ടിക്കാണിക്കുന്നത്.