സമയത്ത് ലേലം ചെയ്തില്ല; തേക്ക് നശിച്ചു
പുനലൂര്: യഥാസമയം ലേലം ചെയ്ത് വില്ക്കാത്തത് കാരണം വനം വകുപ്പിെന്റ ലക്ഷങ്ങള് വിലവരുന്ന തേക്ക് കഴ ഡമ്ബിങ് ഡിപ്പോയില് നശിച്ചു. കഴകള് വിറകിനുപോലും ഉപയോഗിക്കാന് കഴിയാത്ത നിലയില് ചിതല് കയറി മണ്ണായി. കോന്നി വനം ഡിവിഷനിലെ മണ്ണാറപ്പാറ റേഞ്ച് ഓഫിസിന് സമീപത്തെ ഡമ്ബിങ് ഡിപ്പോയിലാണ് 15ലധികം ലോഡ് കഴ നശിച്ചത്.
അലിമുക്ക്-അച്ചന്കോവില് കാനനപാതയോട് ചേര്ന്നാണ് ഡിപ്പോ. മൂന്നുവര്ഷം മുമ്ബ് മണ്ണാറപ്പാറ റേഞ്ചിലെ വിവിധ തേക്ക് തോട്ടങ്ങളില്നിന്നും ഇടവെട്ടിലൂടെ ശേഖരിച്ചതാണ് കഴകള്.
ദൂരദിക്കിലുള്ള തോട്ടങ്ങളില് നിന്നും വെട്ടി ഡിപ്പോയില് അട്ടിവെച്ച കഴകളില് ഒന്നും രണ്ടും ക്ലാസിലുള്ള കഴകള് ലേലം ചെയ്ത് വിറ്റു. ബാക്കിയുള്ള മൂന്ന്, നാല്, അഞ്ച് ഇനം കഴകളാണ് വില്ക്കാനുള്ളത്. ഈ കഴകളും ലേലം ചെയ്ത് നല്കാനുള്ള നടപടി ക്രമങ്ങള് ഡിവിഷന് ഓഫിസില് പൂര്ത്തിയാക്കിയിരുന്നു. എന്നാല് നോട്ടിഫിക്കേഷന് ഉള്പ്പെടെ ശേഷിക്കുന്ന നടപടി ചെയ്യാത്തതിനാല് ലേലം നടന്നില്ല.
ഡി.എഫ്.ഒ ആണ് നോട്ടിഫിക്കേഷന് നടപടി നടത്തി ലേലം ചെയ്യേണ്ടത്. അന്നത്തെ ഡി.എഫ്.ഒ ഇതിനകം സര്വിസില്നിന്ന് വിരമിച്ചു.
കഴ നശിക്കുന്നത് ഒഴിവാക്കാന് ലേലം ചെയ്തുനല്കണമെന്ന് സ്ഥലത്തെ ലോഡിങ് തൊഴിലാളികള് പലതവണ വനം അധികൃതരെ അറിയിച്ചിട്ടും നടപടിയുണ്ടായില്ല. കഴ ലേലം എടുക്കുന്നവര്ക്ക് ലോഡിങ് കൂലി കുറച്ച് നല്കാമെന്നും തൊഴിലാളികള് അറിയിച്ചിരുന്നു.
വിളവ് കുറവുള്ള കഴകളായതിനാല് കുറഞ്ഞത് ആറുമാസത്തിനുള്ളിലെങ്കിലും ലേലം ചെയ്ത് വിറ്റിെല്ലങ്കില് നശിക്കും. കൂടാതെ ഇത്തരം കഴകള് പഴക്കമേറുന്തോറും മതിയായ വിലയും ലഭിക്കുകയില്ല. കഴ നശിച്ചതിലൂടെ ഖജനാവിന് ലഭിക്കേണ്ട ലക്ഷങ്ങള് നഷ്ടമായത് കൂടാതെ ഇത് മുറിച്ച് ഡിപ്പോയിലെത്തിച്ച കൂലി ഇനത്തിലും വന് തുക നഷ്ടമായി.