ആലുവ: മണപ്പുറത്ത് ശിവരാത്രി കച്ചവടത്തിനെത്തിയവര് തമ്മില് മദ്യലഹരിയില് ഏറ്റുമുട്ടിയതിനെ തുടര്ന്ന് ഒരാള് കൊല്ലപ്പെട്ടു. വടുതലയില് വാടകക്ക് താമസിക്കുന്ന തമിഴ്നാട് സ്വദേശി ദിലീപ് (45) ആണ് മരിച്ചത്. ആലുവ ഓള്ഡ് ദേശം റോഡില് മാളിയേക്കല് വീട്ടില് സലിം (57), കടവന്ത്ര ഉദയനഗര് കോളനിയിലെ രാജ്കുമാര് (രാജു - 68) എന്നിവര് അറസ്റ്റിലായി.
ഇന്നലെ രാവിലെ 11.30ഓടെയായിരുന്നു സംഭവം. മണപ്പുറത്ത് കുട്ടികളുടെ കളിപ്പാട്ടങ്ങള് വില്ക്കുന്ന സ്റ്റാള് നടത്തുന്ന സലീമിന്റെ സഹായികളായിരുന്നു കൊല്ലപ്പെട്ട ദിലീപും രാജ്കുമാറും. മൂവരും തമ്മില് മദ്യപാനത്തിനിടെയുണ്ടായ തര്ക്കം സംഘട്ടനത്തിലെത്തുകയായിരുന്നു. തുടര്ന്ന് രാജ്കുമാറും സലീമും ചേര്ന്ന് ദിലീപിനെ മരകൊമ്ബിന് അടിച്ച് കൊലപ്പെടുത്തി. എതിര്വശം ലോഹിതദാസ് സ്മൃതി മണ്ഡപത്തില് ഇരുന്ന ഒരാള് ദൃശ്യങ്ങളെല്ലാം മൊബൈലില് പകര്ത്തിയിരുന്നു. ഇയാളാണ് വിവരം നാട്ടുകാരെ അറിയിച്ചത്.
വാര്ഡ് കൗണ്സിലര് ദിവ്യ സുനില്കുമാര് പൊലീസിനെ വിളിച്ചുവരുത്തി അവശനിലയിലായിരുന്ന ദിലീപിനെ ജില്ലാ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. ആലുവ സി.ഐ എല്. അനില്കുമാറിന്റെ നേതൃത്വത്തിലാണ് അന്വേഷണം