ഡെറാഡൂണ്: ആദി ഗുരു ശ്രീ ശങ്കരാചാര്യരുടെ പ്രതിമ അനാച്ഛാദനം ചെയ്യുന്നതിനായി പ്രധാനമന്ത്രി നരേന്ദ്ര മോദി കേദാര്നാഥിലെത്തി. രാവിലെ 8.30ന് കേദാര്നാഥ് ദാമിലെത്തിയ മോദി ഇഗ്ളു ഹട്ടില് എത്തി കേദാര്നാഥില് പൂര്ത്തിയായ നിര്മ്മാണപ്രവര്ത്തനങ്ങളുടെ സ്ഥിതിഗതികള് വിലയിരുത്തി.
130 കോടി രൂപ ചെലവിട്ടാണ് കേദാര്നാഥിലെ പുനര്നിര്മാണ പ്രവര്ത്തികള് പൂര്ത്തിയാക്കിയിരിക്കുന്നത്. പ്രതിമയുടെ പുനര്നിര്മാണത്തിന് പുറമെ പുരോഹിതരുടെ താമസസ്ഥലങ്ങള്, വിവിധ സ്നാനഘട്ടങ്ങള്, നദിയുടെ പാര്ശ്വഭിത്തികള്, പൊലീസ് സ്റ്റേഷന്, ആശുപത്രി, ഗസ്റ്റ് ഹൗസുകള് എന്നിവയും പുനര്നിര്മിച്ചവയില് ഉള്പ്പെടും. മന്ദാകിനി നദിക്ക് കുറുകെ നിര്മിച്ച പാലവും പുനര്നിര്മിച്ചിട്ടുണ്ട്. ഇതിന് പുറമെ 400 കോടി രൂപ ചെലവ് പ്രതീക്ഷിക്കുന്ന കേദാര്പുരി പുനര്നിര്മാണ പ്രവൃത്തിയുടെ ഉദ്ഘാടനവും പ്രധാനമന്ത്രി നിര്വഹിക്കും.
മൈസൂരുവില് നിന്നുള്ള ശില്പികളാണ് പന്ത്രണ്ടടി ഉയരവും 35 ടണ് ഭാരവുമുള്ള ശങ്കരാചാര്യരുടെ പ്രതിമ തയ്യാറാക്കിയരിക്കുന്നത്. പ്രളയം ഉള്പ്പടെയുള്ള പ്രകൃതിദുരന്തങ്ങളെ അതിജീവിക്കാന് കഴിയുന്ന തരത്തിലാണ് ഇതിന്റെ നിര്മിതി. 2013ലെ പ്രളയത്തില് ശങ്കരാചാര്യരുടെ സമാധിസ്ഥലം ഉള്പ്പടെയുള്ളവയെല്ലാം പൂര്ണമായി തകര്ന്നപോയിരുന്നു. ഇതാണ് ഇപ്പോള് പുനര്നിര്മിച്ചിരിക്കുന്നത്. പ്രതിമാ അനാച്ഛാദനത്തിനശേഷം പ്രധാനമന്ത്രി ക്ഷേത്രത്തില് നടക്കുന്ന മഹാരുദ്രാഭിഷേകത്തിലും പങ്കെടുക്കും.
കൂടാതെ, 400 കോടി രൂപയിലധികം വിലമതിക്കുന്ന കേദാര്പുരി പുനര്നിര്മ്മാണ പദ്ധതികള്ക്കും പ്രധാനമന്ത്രി മോദി തറക്കല്ലിടും. പ്രധാനമന്ത്രിയുടെ സ്വപ്ന പദ്ധതിയായാണ് കേദാര്പുരി പുനര്നിര്മ്മാണം കണക്കാക്കപ്പെടുന്നത്. കൃത്യമായ ഇടവേളകളില് അതിന്റെ പുരോഗതി വ്യക്തിപരമായി തന്നെ മോദി അവലോകനം ചെയ്തിരുന്നു. പ്രധാനമന്ത്രിയായ ശേഷം നിരവധി തവണ മോദി കേദാര്നാഥ് ക്ഷേത്രം സന്ദര്ശിച്ചിട്ടുണ്ട്. പ്രധാനമന്ത്രി എന്ന നിലയില് അദ്ദേഹത്തിന്റെ അഞ്ചാമത്തെ സന്ദര്ശനമാണ് ഇന്നത്തെേത്.