ന്യൂഡല്ഹി/കൊച്ചി: സി.ബി.എസ്.ഇ 10, 12 ക്ളാസ് പരീക്ഷാഫലത്തില് കേരളവും ലക്ഷദ്വീപും ഉള്പ്പെട്ട തിരുവനന്തപുരം മേഖല ഇക്കുറിയും ഒന്നാംസ്ഥാനത്ത്. ഇരുവിഭാഗങ്ങളിലും വിജയശതമാനം 99.91. പതിനാറ് മേഖലകളിലെ ഏറ്റവും ഉയര്ന്ന വിജയശതമാനമാണിത്. കഴിഞ്ഞ ഏതാനും വര്ഷങ്ങളായി 12, 10 ക്ളാസുകളിലെ വിജയത്തില് കേരളമാണ് മുന്നില്.
ദേശീയ തലത്തില് 12-ാം ക്ളാസില് 87.33, പത്തില് 93.12 ശതമാനമാണ് വിജയം. യഥാക്രമം 92.71, 94.40 ആണ് കഴിഞ്ഞവര്ഷത്തെ വിജയശതമാനം. ഇന്ത്യയിലും 26 രാജ്യങ്ങളിലുമായി 28,471 സ്കൂളുകളിലായി 21,65,805 വിദ്യാര്ത്ഥികളാണ് ഇക്കുറി പത്താംക്ളാസ് പരീക്ഷയെഴുതിയത്. വിജയശതമാനത്തില് പെണ്കുട്ടികളാണ് മുന്നില്– 94.25. ആണ്കുട്ടികളില് 92.27 %. സപ്ളിമെന്ററി പരീക്ഷ ജൂലായില്. മേയ് 16മുതല് റീവാല്യുവേഷന് അപേക്ഷിക്കാം.
16.9 ലക്ഷം വിദ്യാര്ത്ഥികള് പരീക്ഷയെഴുതിയ 12-ാം ക്ളാസിലും പെണ്കുട്ടികളാണ് മുന്നില്– 90.68%. ആണ്കുട്ടികളുടേത് 84.67ശതമാനം. അഞ്ച് വിഷയങ്ങളില് ഒന്നില് 33 ശതമാനത്തില് താഴെ മാര്ക്ക് നേടിയവര് ജൂലായില് നടക്കുന്ന കമ്ബാര്ട്ട്മെന്റ് പരീക്ഷ പാസാകണമെന്ന് സി.ബി.എസ്.ഇ പരീക്ഷാ കണ്ട്രോളര് സന്യം ഭരദ്വാജ് അറിയിച്ചു.നേരത്തെ ഫലം പ്രഖ്യാപിച്ചത് ഉന്നതപഠനത്തിനും മത്സരപ്പരീക്ഷകള്ക്കും തയ്യാറാകുന്ന വിദ്യാര്ത്ഥികള്ക്ക് സഹായമാകും.