നൂപുർ ശർമ്മയ്‌ക്കെതിരായ എല്ലാ എഫ്‌ഐആറുകളും ഡൽഹിയിലേക്ക് മാറ്റും

ന്യൂഡൽഹി: പ്രവാചക പരാമർശവുമായി ബന്ധപ്പെട്ട കേസിൽ ബിജെപി മുൻ വക്താവ് നൂപുർ ശർമ്മയ്‌ക്ക് അനുകൂല വിധി പുറപ്പെടുവിച്ച് സുപ്രീംകോടതി. നൂപുർ ശർമ്മയ്‌ക്കെതിരെ വിവിധ സംസ്ഥാനങ്ങളിൽ രജിസ്റ്റർ ചെയ്ത കേസുകളുമായി ബന്ധപ്പെട്ട അന്വേഷണം ഡൽഹിയിലേക്ക് മാറ്റാൻ കോടതി ഉത്തരവിട്ടു. വിവിധ ഭാഗങ്ങളിൽ രജിസ്റ്റർ ചെയ്ത എല്ലാ എഫ്‌ഐആറുകളും ഡൽഹിയിലേക്ക് മാറ്റണമെന്ന് ആവശ്യപ്പെട്ടാണ് നുപൂർ ശർമ്മ സുപ്രീംകോടതിയെ സമീപിച്ചത്.

മഹാരാഷ്‌ട്ര, തെലങ്കാന, പശ്ചിമബംഗാൾ, കർണ്ണാടക, ഉത്തർപ്രദേശ്, അസം, ജമ്മു കശ്മീർ എന്നീ സംസ്ഥാനങ്ങളിലാണ് നുപൂർ ശർമ്മയ്‌ക്കെതിരെ എഫ്‌ഐആറുകൾ രജിസ്റ്റർ ചെയ്തിട്ടുള്ളത്. അന്വേഷണത്തിന്റെ ഭാഗമായി വിവിധ സ്ഥലങ്ങളിലേക്ക് പോകുന്നത് തന്റെ സുരക്ഷയെ ബാധിക്കുമെന്ന് ചൂണ്ടിക്കാട്ടിയായിരുന്നു നുപൂർ ശർമ്മ ഹർജി നൽകിയത്. ഇത് അംഗീകരിച്ച കോടതി അനുകൂല വിധി പുറപ്പെടുവിക്കുകയായിരുന്നു. അതേസമയം നൂപുർ ശർമ്മയുടെ ആവശ്യത്തെ ബംഗാൾ സർക്കാർ കോടതിയിൽ എതിർത്തു.

വൈകീട്ട് 3.30 ഓടെയാണ് കോടതി ഹർജി പരിഗണിച്ചത്. ജസ്റ്റിസുമാരായ സൂര്യരാന്ത്, ജെബി പർദിവാല എന്നിവരുടെ പ്രത്യേക ബെഞ്ചാണ് ഹർജിയിൽ വാദം കേട്ടത്.