ന​ഗരൂര്‍ വെടിവെയ്പ് കേസ് , തോക്കിന് പ്രഹരശേഷിയില്ല

കൃഷ്ണകുമാർ സി

കിളിമാനൂർ:ന​ഗരൂർ പോലീസ് സ്റ്റേഷൻ പരിധിയിൽ ​ഗേറ്റ് മുക്കിൽ യുവാക്കൾക്ക് നേരെ വെടി ഉതിർത്ത സംഭവത്തിൽ തോക്കിന് പ്രഹരശേഷിയില്ലെന്ന് ഫോറൻസിക് നി​ഗമനം. ന​ഗരൂർ ​ഗേറ്റ്മുക്ക് ജം​ഗ്ഷനിൽ ഞായറാഴ്ച വൈകിട്ട് 6.30നാണ് ഉദയകുമാർ, മനീഷ് എന്നീ യുവാക്കൾക്ക് നേരെ ഇളമ്പയിൽ എസ്റ്റേറ്റിൽ അർജ്ജുൻ (32) എയർ​ഗൺ ഉപയോ​ഗിച്ച് രണ്ട് തവണ വെടി ഉതിർത്തത്. സംഭവത്തിൽ ന​ഗരൂർ പോലീസ് ഉടൻതന്നെ അർജ്ജുനെയും കൃത്യം നടത്താൻ ഉപയോ​ഗിച്ച തോക്കും കസ്റ്റഡിയിൽ എടുത്തു. തുടർന്ന് കേസ് രജിസ്റ്റർ ചെയ്തു.

അർജ്ജുന്റെ പിതാവ് വിജയകുമാറിന് 3 തോക്കുകൾക്കുള്ള ലൈസൻസ് ഉണ്ട്. തുടർന്ന് എയർ​ഗൺ ആണോ മറ്റ് തോക്കുകളിൽ നിന്നാണോ വെടി ഉതിർത്തത് എന്ന പരിശോധനക്കായി ഫോറൻസിക് സംഘം സ്ഥലത്തെത്തി. വിശദ പരിശോധനയിൽ 22 വർഷത്തിലധികം പഴക്കമുള്ള എയർ​ഗണിൽ നിന്നാണ് വെടി ഉതിർത്തതെത്തും ഇതിൽ ഉണ്ട ഉപയോ​ഗിക്കാൻ കഴിയില്ലെന്നും ഫോറൻസിക് റിപ്പോർട്ട് ലഭിച്ചതായി എസ് ഐ സഹിൽ അറിയിച്ചു.

അതേസമയം ആരോപണ വിധേയനായ അർജുനും കുടുംബത്തിനുമെതിരെ നിരവധി പരാതികളാണ് ഉയരുന്നത്. ഇവരുടെ ഉടമസ്ഥതയിലുള്ള പതിനഞ്ച് ഏക്കറോളം ഭൂമി കാട് കയറിയ നിലയിലാണ് . നൂറുകണക്കിന് കാട്ടുപന്നികളാണ് ഈ പുരയിടത്തിൽ ഉള്ളത്. രാത്രിയിൽ കാട്ടുപന്നികളെ വെടിവെച്ച് കൊന്ന് ഭക്ഷിക്കുന്നതായും നാട്ടുകാർ ആരോപിക്കുന്നു. പ്രതിയുടെ കുടുംബാം​ഗങ്ങൾ നേരത്തെയും പലരെയും തോക്ക് ചൂണ്ടി വധഭീഷണി മുഴക്കിയിരുന്നതായി പരാതിയുണ്ട്. ഇവരുടെ പുരയിടത്തിൽ നിന്ന മുളവിൽപനയുമായി ബന്ധപ്പെട്ടായിരുന്നു സംഭവം. മുളവിൽപനയുമായി ബന്ധപ്പെട്ട് അഡ്വാൻസ് കൈപ്പറ്റുകയും എന്നാൽ ഈ മുള സമയം വൈകിയെന്ന കാരണത്താൽ കുടുംബം മറിച്ചുവിൽക്കുകയുമായിരുന്നു.

തുടർന്ന് അഡ്വാൻസ് തുക തിരികെ ചോദിക്കാൻ ചെന്നപ്പോഴായിരുന്നു വ്യാപാരിയുടെ നേർക്ക് തോക്ക് ചൂണ്ടി ഭീഷണി മുഴക്കിയത്. ഇതുമായി ബന്ധപ്പെട്ട് വ്യാപാരി അന്ന് ന​ഗരൂർ സ്റ്റേഷനിൽ പരാതിയും നല്‍കിയിരുന്നു. വേനൽകാലത്ത് തോപ്പിൽ കടവിൽ കുളിക്കാൻ പോയിരുന്ന പ്രദേശവാസികൾക്ക് നേരെയും പ്രതിയും കുടുംബവും ഭീഷണി മുഴക്കിയിരുന്നതായും പരാതിയുണ്ട്. കുടുംബത്തിനുള്ള മൂന്ന് തോക്കുകളുടെയും ലൈസൻസ് അടിയന്തരമായി റദ്ദ് ചെയ്ത് തോക്ക് കണ്ടുകെട്ടണമെന്നതാണ് നാട്ടുകാരുടെ ആവശ്യം.