തിരൂരങ്ങാടി: പൂക്കിപറമ്പില്നിന്ന് ജമ്മു കശ്മീര് വരെ ഓട്ടോയില് സാഹസിക യാത്ര നടത്തി തിരിച്ചെത്തി നാല് യുവാക്കള്. ഒക്ടോബര് 28നാണ് പൂക്കിപറമ്പില്നിന്ന് നൂറുദ്ദീന്റെ 2007 മോഡല് പ്രൈവറ്റ് ഒട്ടോയില് ഇവര് യാത്ര തുടങ്ങിയത്. കര്ണാടക, ഗോവ, മഹാരാഷ്ട്ര, ഗുജറാത്ത്, രാജസ്ഥാന്, പഞ്ചാബ് എന്നിവിടങ്ങളില് ചുറ്റിക്കണ്ട് ജമ്മു കാശ്മീരിലെ സോജില പാസ് വരെ യാത്ര നടത്തി.തിരിച്ച് ഹിമാചല് പ്രദേശ്, ഹരിയാന, ഡല്ഹി, യു.പി, മധ്യപ്രദേശ്, തെലങ്കാന, ആന്ധ്രപ്രദേശ്, കര്ണാടക, തമിഴ്നാട്, വയനാട് എന്നിവിടങ്ങളില് ചുറ്റി കറങ്ങിയാണ് ഡിസംബര് മൂന്നിന് പൂക്കിപറമ്പില് തിരിച്ചെത്തിയത്. 38 ദിവസത്തെ യാത്രക്കൊടുവിലാണ് നാട്ടിലെത്തിയത്.
യാത്ര തുടങ്ങി കര്ണാടകയെത്തിയപ്പോള് ഓട്ടോയുടെ ടയര് പഞ്ചറായതല്ലാതെ മറ്റു ബുദ്ധിമുട്ടുകളൊന്നും ഉണ്ടായില്ല. തൊഴിലില് നിന്നു സമ്ബാദ്യം മിച്ചം വെച്ച തുകക്കാണ് നാട് ചുറ്റാന് ഇറങ്ങിയത്. താമസത്തിന് ടെന്റും ഭക്ഷണം പാകം ചെയ്ത് കഴിച്ചുമാണ് ഇവര് യാത്ര നടത്തിയത്. ജമ്മുകശ്മീരില് മാത്രമാണ് ഇവര് ഒരു ദിവസം റൂം വാടകക്ക് എടുത്ത് താമസിച്ചത്. 9000 കിലോമീറ്ററിനപ്പുറം കറങ്ങിയാണ് ഇവര് ഓട്ടോയില് തിരിച്ചെത്തിയത്.