![“Manju”](https://santhigirinews.org/wp-content/uploads/2020/04/YOUTUBE.jpg")
സിന്ധുമോള്‍ ആര്‍
ന്യൂഡല്‍ഹി: രാജ്യത്ത് കോവിഡ് ബാധിതര്‍ 20 ലക്ഷം കടന്നു. വിവിധ സംസ്ഥാനങ്ങളില്‍ നിന്നുളള പുതിയ കോവിഡ് കണക്കുകള്‍ പുറത്തുവന്നതോടെയാണ് രാജ്യത്തെ കോവിഡ് ബാധിതരുടെ എണ്ണം 20 ലക്ഷം കടന്നത്. നിലവില്‍ ബ്രസീലും അമേരിക്കയുമാണ് ഇന്ത്യയ്ക്ക് മുന്നില്‍. രാജ്യത്ത് കോവിഡ് മരണം 40,000 പിന്നിട്ടു. ജൂലൈ 17ന് ആയിരുന്നു ഇന്ത്യയില്‍ രോഗികളുടെ എണ്ണം പത്തു ലക്ഷം പിന്നിട്ടത്. 20 ദിവസം കഴിഞ്ഞപ്പോള്‍ രോഗികള്‍ 20 ലക്ഷമായി.
വ്യാഴാഴ്ച രാവിലെ കേന്ദ്രസര്‍ക്കാര്‍ പുറത്തുവിട്ട കണക്ക് അനുസരിച്ച്‌ 19.65 ലക്ഷം പേര്‍ക്കാണ് കോവിഡ് സ്ഥിരീകരിച്ചത്. പുതുതായി 50,000ല്‍പ്പരം കേസുകള്‍ റിപ്പോര്‍ട്ട് ചെയ്തതായാണ് കേന്ദ്രസര്‍ക്കാരിന്റെ കണക്കുകള്‍ വ്യക്തമാക്കിയത്. എന്നാല്‍ വൈകീട്ട് വിവിധ സംസ്ഥാനങ്ങള്‍ പുറത്തുവിട്ട കണക്കുകള്‍ കൂടി ചേര്‍ക്കുമ്ബോള്‍ രാജ്യത്തെ കോവിഡ് ബാധിതര്‍ 20 ലക്ഷം കടന്നിരിക്കുകയാണ്. മഹാരാഷ്‌ട്രയാണു കോവിഡ് രോഗികളില്‍ ഒന്നാംസ്ഥാനത്ത്. തമിഴ്നാട് രണ്ടാംസ്ഥാനത്തും ആന്ധ്രപ്രദേശ് മൂന്നാംസ്ഥാനത്തും കര്‍ണാടക നാലാം സ്ഥാനത്തുമാണ്. മഹാരാഷ്‌ട്രയിലും ആന്ധ്രയിലും പ്രതിദിന രോഗികളുടെ എണ്ണം പതിനായിരം കടന്നു. രോഗമുക്തി നിരക്ക് 67 ശതമാനത്തിനു മുകളിലായത് ആശ്വാസമാണ്.
ജനുവരി 30നു കേരളത്തിലായിരുന്നു ആദ്യ കോവിഡ് പോസിറ്റീവ് കേസ് സ്ഥിരീകരിച്ചത്. ആദ്യ കോവിഡ് മരണം കര്‍ണാടകയിലായിരുന്നു. തുടക്കം മുതല്‍ കോവിഡ് രോഗികളുടെ എണ്ണത്തിലും മരണത്തിലും മുന്നില്‍ നില്‍ക്കുന്നത് മഹാരാഷ്‌ട്രയാണ്. ഒരു ഘട്ടത്തില്‍ അതിതീവ്ര രോഗവ്യാപനമുണ്ടായിരുന്ന ഡല്‍ഹിയില്‍ രോഗികളുടെ എണ്ണത്തില്‍ കുറവുണ്ടായിട്ടുണ്ട്. കേന്ദ്രസര്‍ക്കാരിന്റെ കണക്ക് പ്രകാരം 13.28 ലക്ഷം പേരാണ് രോഗമുക്തി നേടിയത്
