പാര്‍ട്ടിയില്‍ നിന്ന് അവധിയെടുത്തത് വ്യക്തിപരമായ കാരണങ്ങളാല്‍; ഷിബു ബേബിജോണ്‍

കൊല്ലം: ആര്‍എസ്പിക്കാരനായി തന്നെ മുന്നോട്ടു പോകുമെന്നും പാര്‍ട്ടിയില്‍ നിന്ന് അവധിയെടുത്തത് വ്യക്തിപരമായ കാരണങ്ങളാല്‍ ആണെന്നും ആര്‍എസ്പി നേതാവ് ഷിബു ബേബി ജോണ്‍. പാര്‍ട്ടിക്ക് ദോഷമാകുന്ന ഒന്നും ചെയ്യില്ല. പ്രതിസന്ധി ഘട്ടത്തിലൂടെയാണ് പാര്‍ട്ടി കടന്നുപോവുന്നതെന്നും ഷിബു പറഞ്ഞു.പാര്‍ട്ടിയില്‍ നിന്ന് അവധിയെടുത്തതിന് രാഷ്ട്രീയ പ്രവര്‍ത്തനം അവസാനിപ്പിച്ചെന്ന് അര്‍ത്ഥമില്ലെന്നും അവധി പാര്‍ട്ടി അംഗീകരിച്ചിട്ടില്ലെന്നും ഷിബു ബേബിജോണ്‍ കൂട്ടച്ചേര്‍ത്തു.

ചവറയില്‍ യുഡിഎഫ് അനുഭാവികളെ കൂടെ നിര്‍ത്താന്‍ പറ്റിയില്ലെന്നും ആര്‍എസ്പി, കോണ്‍ഗ്രസ് അനുഭാവികളുടെ വോട്ടുകള്‍ ചോര്‍ന്നെന്നും ഷിബു ബേബിജോണ്‍ പറഞ്ഞു. ഉത്തരേന്ത്യന്‍ രാഷ്ട്രീയത്തിന്റെ നിലയിലേക്ക് കേരളം മാറി. ആളുകള്‍ സമുദായ അടിസ്ഥാനത്തില്‍ വോട്ടു ചെയ്യുന്ന നിലയിലേക്ക് എത്തി. സമയബന്ധിതമായി തീരുമാനങ്ങളെടുക്കാന്‍ കോണ്‍ഗ്രസ് നേതൃത്വത്തിന് കഴിയണമെന്നും ഷിബു ബേബി ജോണ്‍ പറഞ്ഞു.