റഷ്യ കോവിഡ് വാക്സിന് നിര്മാണം തുടങ്ങി; ഓഗസ്റ്റ് അവസാനത്തോടെ മരുന്ന് ലഭ്യമാകും
ശ്രീജ.എസ്
മോസ്കോ: റഷ്യ കോവിഡ് വാക്സിന്റെ വ്യാവസായിക അടിസ്ഥാനത്തിലുള്ള നിര്മാണം ആരംഭിച്ചു. ഈ മാസം അവസാനത്തോടെ വാക്സിന് വിപണയില് എത്തിക്കുമെന്നും റഷ്യ അവകാശപ്പെട്ടു.
ലോകത്തിലെതന്നെ ആദ്യ കോവിഡ് വാക്സിനെന്ന പ്രഖ്യാപനത്തോടെ റഷ്യ പുറത്തിറക്കിയ സ്പുട്നിക്-5 വാക്സിന്റെ ഫലത്തിനായുള്ള കാത്തിരിപ്പിലാണു ലോകം. റഷ്യയുടെ കോവിഡ് വാക്സിന് ആദ്യമായി പ്രയോഗിക്കപ്പെട്ട തന്റെ മകളില് ആന്റിബോഡി ഉത്പാദനം മികച്ച രീതിയില് നടന്നെന്നു റഷ്യന് പ്രസിഡന്റ് പുടിന് അവകാശപ്പെടുന്നു. ജൂണ് 18നാണു വാക്സിന്റെ മനുഷ്യരിലുള്ള ക്ലിനിക്കല് ട്രയല് ആരംഭിച്ചത്. 38 വോളന്റിയര്മാര്ക്കാണ് ടെസ്റ്റ് ഡോസ് നല്കിയത്. അവര്ക്കെല്ലാവര്ക്കും 21-ാം ദിവസം മികച്ച രീതിയില് പ്രതിരോധശേഷി ലഭിച്ചെന്നാണ് പ്രതിരോധ മന്ത്രാലയത്തിന്റെ അവകാശവാദം.
അഡനോവൈറസ് അടിസ്ഥാനമാക്കിയുള്ള വാക്സിനാണ് ഗമലെയയില് വികസിപ്പിച്ചതെന്ന് നാഷനല് റിസര്ച്ച് സെന്റര് തലവന് അലക്സാണ്ടര് ഗിന്റ്സ്ബര്ഗ് പറയുന്നു. അതേസമയം റഷ്യയുടെ കൊവിഡ് വാക്സിന് പരീക്ഷണ ഘട്ടം പൂര്ണമായും പൂര്ത്തിയായിട്ടുണ്ടോ എന്നതില് ആഗോള തലത്തില് ആശങ്കയുണ്ട്.