സംസ്ഥാന മെഡിക്കല്, ആയുര്വേദ റാങ്ക് പട്ടിക പ്രസിദ്ധീകരിച്ചു
സിന്ധുമോൾ. ആർ
തിരുവനന്തപുരം: ഈ വര്ഷത്തെ മെഡിക്കല് അനുബന്ധ പ്രവേശനത്തിനുള്ള സംസ്ഥാന റാങ്ക് പട്ടിക പ്രസിദ്ധീകരിച്ചു. ദേശീയ നീറ്റ് പട്ടികയില് ദേശീയ തലത്തില് പന്ത്രണ്ടാം റാങ്ക് നേടിയ കോഴിക്കോട് കൊയിലാണ്ടി സ്വദേശിനി എസ് ആയിഷക്കാണ് ഒന്നാം റാങ്ക്. പാലക്കാട് കയറാടി നെന്മാറ അടിപ്പെരണ്ട കെ എ കെ മന്സിലില് എ ലുലു (നീറ്റ് AIR 22) രണ്ടാം റാങ്ക് നേടി. കോഴിക്കോട് വെള്ളിമാട്കുന്ന് സ്വദേശി സനീഷ് അഹമ്മദിനാണ് (നീറ്റ് AIR 25) മൂന്നാം റാങ്ക്. ഫിലെമോന് കുര്യാക്കോസ് (നീറ്റ് AIR 50) നാലാം റാങ്ക് നേടി. ആയുര്വേദ കോഴ്സ് പ്രവേശനത്തിനുള്ള റാങ്ക് പട്ടികയും പ്രസിദ്ധീകരിച്ചിട്ടുണ്ട്. ആകെ 48,541 പേരാണ് റാങ്ക് പട്ടികയില് സ്ഥാനംപിടിച്ചത്.
ദേശീയ നീറ്റ് പട്ടികയില് ദേശീയ തലത്തില് പന്ത്രണ്ടാം റാങ്ക് നേടിയ കോഴിക്കോട് സ്വദേശി എസ്. ആയിഷയാണ് കേരളത്തില് നിന്നുള്ളവരില് മുന്നില്. 710 മാര്ക്കാണ് ആയിഷയ്ക്ക്. ഇരുപത്തിരണ്ടാം റാങ്ക് നേടിയ എ ലുലു (706 മാര്ക്ക്), ഇരുപത്തഞ്ചാം റാങ്ക് നേടിയ സനീഷ് അഹമ്മദ് (705 മാര്ക്ക്) എന്നിവര് കേരള ലിസ്റ്റില് തൊട്ടുപിന്നില്. അമ്പതാം റാങ്ക് കേരളത്തില് നിന്നുള്ള ഫിലെമോന് കുര്യാക്കോസിന്- 705 മാര്ക്ക്.
മെഡിക്കല് പ്രവേശനത്തിനായി അപേക്ഷിച്ചവരും റാങ്ക് ലിസ്റ്റ് തയ്യാറാക്കുന്നതിനായി നീറ്റ് യു ജി 2020 ഫലം നിശ്ചിത സമയത്തിനകം പ്രവേശന പരീക്ഷാ കമ്മീഷണര്ക്ക് സമര്പ്പിച്ചവരുമാണ് പട്ടികയിലുള്ളത്. റാങ്കുകള് www.cee.kerala.gov.in എന്ന വെബ്സൈറ്റില് ലഭ്യമാണ്.
വിദ്യാര്ഥികള്ക്ക് ‘KEAM 2020- Candidate Portal’ എന്ന ആപ്ലിക്കേഷന് നമ്ബരും പാസ്വേഡും നല്കി ഹോം പേജില് പ്രവേശിച്ച് ‘Result’ എന്ന മെനു ഐറ്റം ക്ലിക്ക് ചെയ്താല് റാങ്ക് വിവരങ്ങള് ലഭ്യമാകും. സംസ്ഥാന റാങ്ക് ലിസ്റ്റില് ഉള്പ്പെട്ടിട്ടുള്ള വിദ്യാര്ഥികള് പ്രൊഫഷനല് ഡിഗ്രി കോഴ്സുകളിലെ പ്രവേശനത്തിനായുള്ള പ്രോസ്പക്ടസിലെ ക്ലോസ് 6 പ്രകാരമുള്ള യോഗ്യതകള് പ്രവേശന സമയത്ത് നേടിയിരിക്കണം.