ബംഗളുരു: ക്ഷേത്രത്തിലേക്ക് വെള്ളികൊണ്ടു തീര്ത്ത ഹെലികോപ്റ്റര് മാതൃക സമര്പ്പിച്ചു കര്ണാടക കോണ്ഗ്രസ് അധ്യക്ഷന് ഡി.കെ. ശിവകുമാര്. ഹൂവിനഹദഗലി മൈലാര്ലിംഗേശ്വര ക്ഷേത്രത്തിലാണു ശിവകുമാര് നേര്ച്ച നടത്തിയത്.
ബെല്ലാരിയിലെ ക്ഷേത്രത്തില് 2018-ല് ഹെലികോപ്റ്ററിലെത്തി സന്ദര്ശനം നടത്തിയതിനു പ്രായശ്ചിത്തമായാണു വെള്ളികൊണ്ടുള്ള ഹെലികോപ്റ്റര് മാതൃക ഇദ്ദേഹം നല്കിയത്. പതിനായിരക്കണക്കിനു തീര്ഥാടകര് എത്തുന്ന ക്ഷേത്രത്തിനു മുകളിലൂടെ പറന്നതിനെ തുടര്ന്നാണ് ആദായനികുതി റെയ്ഡുകള് ഉള്പ്പെടെയുള്ള അനര്ഥങ്ങള് നടന്നതെന്നു പാര്ട്ടി പ്രവര്ത്തകര് കരുതി. അതിലൊരാള് സംഭാവന ചെയ്തതാണ് ഹെലികോപ്റ്റര് മാതൃകയെന്നു ശിവകുമാര് പറഞ്ഞു.
വാര്ഷിക കര്ണികയോടനുബന്ധിച്ച് ലക്ഷണക്കണക്കിനാളുകള് പദയാത്രയായി ക്ഷേത്രത്തിലെത്തിയപ്പോഴായിരുന്നു ശിവകുമാര് ഹെലികോപ്റ്ററില് വന്നത്. കര്ണാടകയില് ഗ്രാമപഞ്ചായത്ത് തെരഞ്ഞെടുപ്പ് നടക്കാനിരിക്കെയാണു ശിവകുമാറിന്റെ ക്ഷേത്ര ദര്ശനവും പ്രായശ്ചിത്ത നേര്ച്ചയും.