മൂന്ന് കടകളില് തീപിടിത്തം
തിരുവനന്തപുരം: കുമാരപുരം ജങ്ഷനില് മൂന്ന് കടകളില് വന് തീപിടിത്തം. കുമാരപുരം എ.ജെ ഹാളിന് സമീപമുള്ള മെഡിക്കല് സ്റ്റോര്, ഫുട്വെയര് ഷോപ്, ബാര്ബര് ഷോപ്പ് എന്നിവയിലാണ് അഗ്നിബാധയുണ്ടായത്. മൂന്ന് കടകളും പൂര്ണമായി കത്തിനശിച്ചു. ചൊവ്വാഴ്ച വൈകീട്ട് മൂന്നരക്കാണ് സംഭവമുണ്ടായത്.
ആദ്യം തീ പിടിച്ചത് ഫാന്സി സ്റ്റോറിലാണ്. തീ അതിവേഗത്തില് പടര്ന്നതിനെ തുടര്ന്ന് ജീവനക്കാര് പുറത്തിറങ്ങി. ഉടന് തന്നെ ചാക്കയിലെ അഗ്നിശമന നിലയത്തില് വിളിക്കുകയായിരുന്നു. ഫയര്ഫോഴ്സ് എത്തുമ്പോഴേക്കും സമീപത്തുണ്ടായിരുന്ന രണ്ട് കടകളിലേക്കുകൂടി തീപടര്ന്നിരുന്നു. ഫാന്സി സ്റ്റോര് ജീവനക്കാര് ബഹളംവെച്ച് സമീപത്തെ കടക്കാരെ അറിയിച്ചതിനാല് ആളപായമുണ്ടായില്ല.
രാജാജി നഗറില് നിന്നും ചാക്കയില് നിന്നും നാല് ഫയര്ഫോഴ്സ് യൂണിറ്റെത്തിയാണ് തീ നിയന്ത്രണവിധേയമാക്കിയത്. ഫാന്സി കടയിലെ ഷോര്ട്ട് സര്ക്യൂട്ട് അപകടകാരണമായെന്നാണ് പ്രാഥമിക നിഗമനം. മൂന്ന് കടകള്ക്കുകൂടി 20 ലക്ഷം രൂപയുടെ നഷ്ടമുണ്ടായെന്നാണ് വിലയിരുത്തല്.