ഫെയ്‌സ്ബുക്ക് ലൈവില്‍ ആത്മഹത്യാ ശ്രമം

മുംബൈ: ലൈവായി ആത്മഹത്യ ചെയ്യാനുള്ള യുവാവിന്റെ ശ്രമം പരാജയപ്പെടുത്തി ഫെയ്‌സ്ബുക്കിന്റെ അയര്‍ലന്‍ഡ് ഓഫീസ്. മുംബൈ സ്വദേശിയായ 23കാരനാണ് ഞായറാഴ്ച രാത്രി ജീവനൊടുക്കാന്‍ ശ്രമിച്ചത്. ഫെയ്‌സ്ബുക്കില്‍ ലൈവിട്ടായിരുന്നു യുവാവിന്റെ സാഹസം. മുംബൈയിലെ ധുലെയിലാണ് സംഭവം.
ബ്ലെയ്ഡുപയോഗിച്ച്‌ കഴുത്ത് മുറിച്ച്‌ മരിക്കാനായിരുന്നു യുവാവിന്റെ ശ്രമം. ഇക്കാര്യം ശ്രദ്ധയിപ്പെട്ട ഉടനെ അയര്‍ലന്‍ഡിലെ ഫെയ്‌സ്ബുക്ക് ഓഫീസില്‍ നിന്നുള്ള സന്ദേശം മുംബൈ പൊലീസിന് ലഭിക്കുകയായിരുന്നു. പെട്ടെന്ന് തന്നെ സ്ഥലത്തെത്തിയ പൊലീസ് യുവാവിനെ അടുത്ത ആശുപത്രിയിലേക്ക് മാറ്റി. യുവാവ് അപകടനില തരണം ചെയ്തതായി പൊലീസ് വ്യക്തമാക്കി.
ഞായറാഴ്ച രാത്രി 8.10ഓടെ മുംബൈ പൊലീസിലെ സൈബര്‍ ഡിസിപി രശ്മി കരണ്‍ദികറിനാണ് അയര്‍ലന്‍ഡിലെ ഫെയ്‌സ്ബുക്ക് ഓഫീസില്‍ നിന്ന് വിളിയെത്തിയത്. മുംബൈയില്‍ യുവാവ് ഫെയ്‌സ്ബുക്ക് ലൈവിട്ട് ആത്ഹത്യയ്ക്ക് ശ്രമിക്കുന്നതായാണ് അവര്‍ വിവരം നല്‍കിയത്. ഇതിന്റെ സ്‌ക്രീന്‍ ഷോട്ടുകളും ഫെയ്‌സ്ബുക്ക് അധികൃതര്‍ കൈമാറി.
പിന്നാലെ സൈബര്‍ പൊലീസ് സംഘം യുവാവിന്റെ സ്ഥലം ട്രാക്ക് ചെയ്യുകയും 20 മിനിറ്റിനുള്ളില്‍ സ്ഥലത്ത് കുതിച്ചെത്തുകയുമായിരുന്നു. അപ്പോഴേക്കും യുവാവ് കഴുത്ത് മുറിച്ചിരുന്നു. ഉടന്‍ തന്നെ പൊലീസ് ആശുപത്രിയിലെത്തിക്കുകയായിരുന്നു.