ശ്രീജ.എസ്
തിരുവനന്തപുരം: ഒരു അന്വേഷണത്തെയും നിയമസഭാ സെക്രട്ടറിയേറ്റ് തടസപ്പെടുത്തുന്നില്ലെന്ന് സ്പീക്കര് പി.ശ്രീരാമകൃഷ്ണന്. കസ്റ്റംസ് അന്വേഷണത്തില് നടപടി ക്രമങ്ങള് പാലിക്കണം. കസ്റ്റംസിന് കത്ത് നല്കിയത് ചട്ടം സൂചിപ്പിച്ചെന്നും സ്പീക്കര്. സെക്രട്ടേറിയറ്റിന്റെ വിശ്വാസ്യത നിലനിര്ത്തിക്കൊണ്ടായിരിക്കണം അന്വേഷണമെന്നും സ്പീക്കര് വ്യക്തമാക്കി. സ്പീക്കറുടെ അനുമതി ഇല്ലാതെ നോട്ടിസ് നല്കാനാവില്ലെന്നും സഭാ വളപ്പില് ഉള്ളവര്ക്ക് പരിരക്ഷയുണ്ടെന്നും സ്പീക്കര് ചൂണ്ടിക്കാട്ടി.
പ്രചരിക്കുന്ന വാര്ത്തകളില് വസ്തുത ഇല്ലെന്നും പി ശ്രീരാമകൃഷ്ണന്. പല വാര്ത്തകളും പ്രചരിക്കുന്നുണ്ട്. അതിനോടൊന്നും പ്രതികരിക്കുന്നില്ലെന്നും അദ്ദേഹം വ്യക്തമാക്കി. സ്പീക്കറെ മാറ്റണമെന്ന പ്രതിപക്ഷം ആവശ്യപ്പെട്ട കത്തില് യുക്തമായ തീരുമാനമെടുക്കും. മുന്പ് പ്രതിപക്ഷ ആവശ്യം തള്ളിയത് നടപടി ചട്ടപ്രകാരം അല്ലാത്തതിനാലാണെന്നും അദ്ദേഹം വ്യക്തമാക്കി.
താന് തെറ്റൊന്നും ചെയ്തിട്ടില്ലെന്നും തന്നെ കസ്റ്റംസ് ചോദ്യം ചെയ്യാന് വിളിയ്ക്കുമെന്ന് കരുതുന്നില്ലെന്നും സ്പീക്കര് പറഞ്ഞു. ഭരണാഘടനാപരമായി ഉത്തരവാദിത്വമുള്ള സ്ഥാനത്തിരിക്കുന്നയാളാണ് താനെന്നും അദ്ദേഹം പറഞ്ഞു. 40 വര്ഷത്തിനിടെ ഒരു രൂപയുടെ കൈക്കൂലി വാങ്ങിയെന്നു തെളിയിച്ചാല് പൊതുജീവിതം അവസാനിപ്പിക്കാമെന്നും അദ്ദേഹം പറഞ്ഞു.