പരമ്പരയ്ക്ക് മുൻപ് ഇന്ത്യയെ ട്രോളി; ഇപ്പോൾ മുഖത്ത് മുട്ടയേറ് കിട്ടിയപോലെ ഉണ്ടെന്ന് മൈക്കൽ വോൺ

ലണ്ടൻ: ഓസ്‌ട്രേലിയയിലെ ടെസ്റ്റ് പരമ്പര വിജയത്തിൽ ഇന്ത്യയ്ക്ക് ലോകത്തിന്റെ വിവിധ ഭാഗങ്ങളിൽ നിന്നും അഭിനന്ദന പ്രവാഹം തുടരുകയാണ്. ക്രിക്കറ്റിലെ മഹാരഥൻമാർ മുതൽ രാഷ്ട്രീയ സാംസ്‌കാരിക രംഗത്തെ പ്രമുഖർ വരെ ടീം ഇന്ത്യയെ പ്രശംസകൾ കൊണ്ട് മൂടുകയാണ്. ഇതിനിടെ മുൻ ഇംഗ്ലണ്ട് നായകൻ മൈക്കൽ വോൺ പങ്കുവെച്ച ഒരു ട്വീറ്റാണ് ഇപ്പോൾ ചർച്ചയാകുന്നത്.

എന്നാൽ, ഓസീസ് പര്യടനം ആരംഭിക്കുന്നതിന് മുൻപ് തന്നെ വോൺ ഇന്ത്യയെ താഴ്ത്തിക്കെട്ടിയിരുന്നു. എല്ലാ ഫോർമാറ്റിലും ഓസ്‌ട്രേലിയ ഇന്ത്യയെ തറപറ്റിക്കുമെന്നായിരുന്നു വോൺ പറഞ്ഞത്. ഒന്നാം ടെസ്റ്റിൽ ഇന്ത്യ പരാജയപ്പെട്ടപ്പോൾ പരമ്പര ഓസ്‌ട്രേലിയ വൈറ്റ് വാഷ് ചെയ്യുമെന്നും അദ്ദേഹം പറഞ്ഞിരുന്നു. എന്നാൽ, അമ്പരപ്പിക്കുന്ന പ്രകടനം പുറത്തെടുത്ത ഇന്ത്യയുടെ യുവനിര പരമ്പര ഓസ്‌ട്രേലിയയിൽ നിന്നും പിടിച്ചെടുക്കുന്ന കാഴ്ചയാണ് പിന്നീട് കാണാനായത്.