ശ്രീജ.എസ്
മുംബൈ: കര്ഷക പ്രക്ഷോഭങ്ങളെ പിന്തുണച്ച വിദേശ സെലിബ്രിറ്റികള്ക്കെതിരെ ട്വിറ്ററിലൂടെ രൂക്ഷമായി പ്രതികരിച്ച ക്രിക്കറ്റ് ഇതിഹാസം സചിന് ടെണ്ടുല്ക്കറെ ഉപദേശിച്ച് മുന് കേന്ദ്രമന്ത്രിയും എന്.സി.പി അധ്യക്ഷനുമായ ശരദ് പവാര്. മറ്റൊരു മേഖലയെ കുറിച്ച് സംസാരിക്കുമ്പോള് ജാഗ്രത പാലിക്കണമെന്നാണ് പവാര് സച്ചിനെ ഉപദേശിച്ചത്.
‘ഇന്ത്യന് സെലിബ്രിറ്റികളുടെ നിലപാടിനോട് പലരും രൂക്ഷമായി പ്രതികരിച്ചു. മറ്റേതെങ്കിലും മേഖലയെ കുറിച്ച് സംസാരിക്കുമ്പോള് ജാഗ്രത പാലിക്കണമെന്ന് ഞാന് സച്ചിനെ ഉപദേശിക്കുന്നു’ പവാര് പറഞ്ഞു.
കാര്ഷിക നിയമങ്ങകള്ക്കെതിരെ സമരം ചെയ്യുന്ന കര്ഷകരെ ഖലിസ്ഥാനികളെന്നും തീവ്രവാദികളെന്നും വിളിക്കുന്ന കേന്ദ്ര സര്ക്കാറിനെ യു.പി.എ സര്ക്കാറില് കൃഷി മന്ത്രി കൂടിയായിരുന്ന അദ്ദേഹം വിമര്ശിച്ചു.
‘നമ്മളെ അന്നം തന്ന് ഊട്ടുന്ന കര്ഷകരാണ് പ്രതിഷേധിക്കുന്നത്. അവരെ ഖലിസ്ഥാനികളെന്നോ തീവ്രവാദികളെന്നോ വിശേഷിപ്പിക്കുന്നത് ശരിയല്ല’ –പവാര് വ്യക്തമാക്കി .
ഇന്ത്യയിലെ കര്ഷക സമരത്തെ പിന്തുണച്ച വിദേശ പോപ് താരം റിഹാനയുടെ ട്വീറ്റ് വിഷയത്തെ അന്താരാഷ്ട്ര തലത്തില് ചര്ച്ചയാക്കിയിരുന്നു. ഇതിന് പിന്നാലെ സ്വീഡിഷ് പരിസ്ഥിതി പ്രവര്ത്തക ഗ്രെറ്റ തുന്ബര്ഗും അഭിഭാഷകയായ മീന ഹാരിസും കര്ഷക സമരത്തിന് പിന്തുണയുമായെത്തിയിരുന്നു .
വിദേശ സെലിബ്രിറ്റികള്ക്കെതിരെ വിമര്ശനവുമായി സച്ചിന് ട്വിറ്ററില് ഇങ്ങനെ കുറിച്ചു
‘ഇന്ത്യയുടെ പരമാധികാരത്തില് വിട്ടുവീഴ്ച ചെയ്യാന് കഴിയില്ല. ബാഹ്യശക്തികള് കാഴ്ചക്കാരായിരിക്കാം. പക്ഷേ പങ്കെടുക്കുന്നവരല്ല. ഇന്ത്യക്കാര്ക്ക് ഇന്ത്യയെ അറിയാം. ഇന്ത്യക്കായി തീരുമാനിക്കണം. ഒരു രാഷ്ട്രമെന്ന നിലയില് നമുക്ക് ഒരുമിച്ചുനില്ക്കാം’.
കര്ഷകര്ക്ക് നേരെ മനുഷ്യാവകാശലംഘനങ്ങള് നടന്ന സമയത്ത് ഒരിക്കല് പോലും മിണ്ടാതിരുന്ന സച്ചിന് അടക്കമുള്ള താരങ്ങള് പെട്ടെന്ന് നിശബ്ദത വെടിഞ്ഞത് കടുത്ത വിമര്ശനങ്ങള്ക്കിടയാക്കിയിരുന്നു.സച്ചിനെതിരെ ട്രോളുമായി നടന് സിദ്ധാര്ഥും രംഗത്തെത്തിയിരുന്നു .