ഗോവർദ്ധൻ പർവ്വതത്തിലെ ശിലകൾ വിൽപ്പനയ്ക്ക് വെച്ചു; മൂന്ന് പേർക്കെതിരെ കേസ്

ലക്നൗ: ഭഗവാൻ ശ്രീകൃഷ്ണൻ എടുത്തുയർത്തിയെന്ന് പറയപ്പെടുന്ന ഗോവർദ്ധൻ പർവ്വതത്തിലെ ശിലകൾ വിൽപ്പന നടത്തിയ മൂന്ന് പേർക്കെതിരെ കേസ്. ഇ കൊമേഴ്സ് വ്യാപാര സ്ഥാപനമായ ഇന്ത്യാ മാർട്ടിന്റെ സ്ഥാപകനും സിഇഒയുമായ ദിനേശ് അഗർവാൾ, സഹോദരൻ ബ്രിജേഷ്, വിതരണക്കാരനായ അങ്കുർ അഗർവാൾ എന്നിവർക്കെതിരെയാണ് ഉത്തർപ്രദേശ് പോലീസ് കേസെടുത്തിരിക്കുന്നത്.

വിവേക ശൂന്യമായ പ്രവൃത്തിയിലൂടെ ഭക്തരുടെ മതവികാരം ഇന്ത്യാ മാർട്ട് വ്രണപ്പെടുത്തിയെന്നാണ് പരാതിയിൽ ആരോപിക്കുന്നത്. ഐടി ആക്ട് പ്രകാരവും ഐപിസിയിലെ വിവിധ വകുപ്പുകൾ ചുമത്തിയുമാണ് എഫ്ഐആർ രജിസ്റ്റർ ചെയ്തിരിക്കുന്നതെന്ന് പോലീസ് അറിയിച്ചു.