സ്ഥാനാർത്ഥികളിലെ സമ്പന്നരിൽ മുന്നിൽ കമൽ ഹാസൻ

ചെന്നൈ: തമിഴ്‌നാട്ടിലെ നിയമസഭാ തെരഞ്ഞെടുപ്പിൽ ജനവിധി തേടുന്ന സ്ഥാനാർത്ഥികളിലെ സമ്പന്നരിൽ മുന്നിൽ കമൽ ഹാസൻ. 176.9 കോടിയുടെ സ്വത്താണ് താരത്തിനുള്ളത്. നാമനിർദ്ദേശ പത്രികയോടൊപ്പം സമർപ്പിച്ച സത്യവാങ്മൂലത്തിലാണ് ഇക്കാര്യങ്ങൾ കാണിച്ചിരിക്കുന്നത്. കോയമ്പത്തൂർ സൗത്ത് മണ്ഡലത്തിലാണ് കമൽ ഹാസൻ മത്സരിക്കുന്നത്.

തമിഴ്‌നാട്ടിൽ ജനവിധിതേടുന്നവരിൽ ഏറ്റവും ധനികരായ മത്സരാർത്ഥികളിലൊരാളാണ് കമൽ. കമലിന്റെ പാർട്ടിയുടെ പ്രസിഡന്റായ ആർ മഹേന്ദ്രനാണ് രണ്ടാമത്തെ ധനികൻ. 160 കോടിയുടെ സ്വത്തുക്കളാണ് അദ്ദേഹത്തിനുള്ളത്. മുഖ്യമന്ത്രി എടപ്പാടി കെ. പളനിസ്വാമി സമർപ്പിച്ച രേഖകൾ പ്രകാരം 6.67 കോടിയുടെ സ്വത്താണ് അദ്ദേഹത്തിന്റെ പേരിലുള്ളത്. ഏപ്രിൽ ആറിനാണ് സംസ്ഥാനത്ത് തെരഞ്ഞെടുപ്പ് നടക്കുന്നത്.