ശ്രീജ.എസ്
ബംഗളൂരു: 15കാരിയുടെ ശരീരത്തില് നിന്ന് സങ്കീര്ണമായ ശസ്ത്രക്രിയയിലൂടെ 3.5 കിലോയുള്ള മുഴ നീക്കം ചെയ്തു. ഗുജറാത്ത് സ്വദേശിയായ പെണ്കുട്ടിക്കായിരുന്നു ശസ്ത്രക്രിയ. ബംഗളൂരുവിലെ ആസ്റ്റര് സി.എം.ഐ ആശുപത്രിയിലെ 21 ഡോക്ടര്മാരുടെ സംഘം നടത്തിയ ശസ്ത്രക്രിയയിലൂടെയാണ് മുഴ നീക്കം ചെയ്ത് പെണ്കുട്ടിയെ ജീവിതത്തിലേക്ക് കൈ പിടിച്ചുയര്ത്തിയത്.
പെണ്കുട്ടിയുടെ കഴുത്തു മുതല് നെഞ്ചുവരെയുള്ള ഭാഗത്തായിരുന്നു മുഴയുണ്ടായിരുന്നത്. കഴിഞ്ഞമാസമാണ് കുട്ടി അര്ബുദത്തിന് ചികിത്സ തേടിയെത്തിയത്. മറ്റു പല ആശുപത്രിയിലും ചികിത്സ തേടിയിരുന്നുവെങ്കിലും ശസ്ത്രക്രിയക്ക് മടിച്ചു. മുഴ വലിയ രീതിയില് വളര്ന്നതിനാല് സ്വന്തം കാര്യങ്ങള് ചെയ്യാന്തന്നെ ബുദ്ധിമുട്ടായിരുന്നു.
പെണ്കുട്ടിക്ക് കഴിഞ്ഞ വര്ഷം മുതല് പഠനവും ഉപേക്ഷിക്കേണ്ടിവന്നു. 70 ലക്ഷത്തോളം രൂപ ചെലവുവന്ന ശസ്ത്രക്രിയക്ക് സന്നദ്ധ സംഘടനയുടെ സഹായത്തോടെയാണ് പണം സമാഹരിച്ചത്. ശസ്ത്രക്രിയക്കുശേഷം പെണ്കുട്ടി ആരോഗ്യം വീണ്ടെടുത്തുവരുന്നതായി ഡോക്ടര്മാര് അറിയിച്ചു .