ന്യൂഡല്ഹി: ജനങ്ങള്ക്ക് സുപ്രീം കോടതി നടപടികള് തത്സമയം കാണാന് ഉടന് സാധിക്കും എന്ന് ചീഫ് ജസ്റ്റീസ് എന്.വി. രമണ. അതിനുള്ള നടപടിക്രമങ്ങള് തുടങ്ങിക്കഴിഞ്ഞെന്നും അദ്ദേഹം അറിയിച്ചു.ചീഫ് ജസ്റ്റീസ് ഇക്കാര്യം പറഞ്ഞത് ഗുജറാത്ത് ഹൈക്കോടതി നടപടികള് തത്സമയം കാണുന്നതിനുള്ള സംവിധാനം ഉദ്ഘാടനം ചെയ്യുന്നതിനിടയിലാണ്.
നിലവില് വിവരങ്ങള് ജനങ്ങള് അറിയുന്നത് മാധ്യമങ്ങളിലൂടെയാണ്. ബെഞ്ചിന്റെ നിരീക്ഷണങ്ങളും ഉന്നയിക്കുന്ന ചോദ്യങ്ങളും അടക്കം ദുര്വ്യാഖ്യാനം ചെയ്യപ്പെടുന്ന സാഹചര്യത്തിലാണ് ഈ തീരുമാനം എന്ന് അദ്ദേഹം വ്യക്തമാക്കി.
കോടതി നടപടികള് ജനങ്ങള്ക്ക് നേരിട്ട് കാണാന് കഴിഞ്ഞാല് അവയെക്കുറിച്ചും ജഡ്ജിമാര് പ്രകടിപ്പിക്കുന്ന അഭിപ്രായങ്ങളെക്കുറിച്ചും അവര്ക്ക് നേരിട്ട് വിവരം ലഭിക്കാന് സാധിക്കുമെങ്കിലും അതീവ ജാഗ്രതയോടെ വേണം ഈ നടപടി സ്വീകരിക്കാനെന്നും ചീഫ് ജസ്റ്റീസ് അറിയിച്ചു.