ബോട്ടപകടത്തില് മരിച്ചവരുടെ കുടുംബങ്ങള്ക്ക് അടിയന്തര സഹായം നല്കും: മന്ത്രി പി. പ്രസാദ്
തിരുവനന്തപുരം: അഴീക്കലില് മത്സ്യബന്ധനം കഴിഞ്ഞ് മടങ്ങുകയായിരുന്ന വള്ളം മറിഞ്ഞ് നാലു പേര് മരിച്ച സംഭവത്തില് സാധ്യമായ എല്ലാ സഹായങ്ങളും സര്ക്കാര് ചെയ്യുമെന്ന് മന്ത്രി പി. പ്രസാദ്. മരിച്ചവരുടെയും പരിക്കേറ്റവരുടെയും കുടുംബങ്ങള്ക്ക് അടിയന്തര സഹായം നല്കുമെന്ന് മന്ത്രി അറിയിച്ചു.
നിരന്തരം അപകടം ഉണ്ടാകുന്ന മേഖലയാണെങ്കില് പരിഹരിക്കാനുള്ള നടപടി ഉണ്ടാകുമെന്ന് മന്ത്രി വ്യക്തമാക്കി. അതേസമയം, കായംകുളത്ത് നിന്ന് മത്സ്യബന്ധനത്തിന് പോയ വള്ളം മുങ്ങി നാല് മരണം. വലിയഴീക്കലില് നിന്ന് മത്സ്യബന്ധനത്തിന് പോയ നാല് പേരാണ് മരിച്ചത്.
സുനില് ദത്ത്, സുദേവന്, തങ്കപ്പന്, ശ്രീകുമാര് എന്നിവരാണ് മരിച്ചത്. ഓംകാരം എന്ന വള്ളമാണ് അപകടത്തില്പ്പെട്ടത്.
ഇന്ന് പുലര്ച്ചെ മൂന്ന് മണിയോടെയാണ് സംഘം മത്സ്യബന്ധനത്തിന് പോയത്. പതിനാറ് മത്സ്യത്തൊഴിലാളികളായിരുന്നു വള്ളത്തില് ഉണ്ടായിരുന്നത്. തുറയില്ക്കടവ്, ആറാട്ടുപുഴ സ്വദേശികളാണിവര്. വള്ളം അപകടത്തില്പ്പെട്ടത് എങ്ങനെയെന്ന് വ്യക്തമല്ല. പന്ത്രണ്ട് പേരെ രക്ഷപ്പെടുത്തി.