ഭോപ്പാല്: മധ്യപ്രദേശില് 27 പേര്ക്ക് ഡെങ്കിപ്പനി സ്ഥിരീകരിച്ചു. ഇതില് 16 പേര് ഗ്വാളിയോറില്നിന്നുള്ളവരാണ്. രോഗം പടരാതിരിക്കാനുള്ള എല്ലാ മുന്കരുതലുകളും സ്ഥിരീകരിച്ചതായി ചീഫ് മെഡിക്കല് ഓഫീസര് ഡോ. മനീഷ് ശര്മ പറഞ്ഞു.
ഈഡിസ് വിഭാഗത്തിലുള്ള കൊതുകുകള് പരത്തുന്ന വൈറസ് രോഗമാണ് ഡെങ്കിപ്പനി. ഈഡിസ് ഈജിപ്തി, ഈഡിസ് അല്ബോപിക്റ്റസ് എന്നീ വിഭാഗത്തിലുള്ള രോഗാണുവാഹകരായ കൊതുകുകള് ഒരാളെ കടിക്കുമ്പോഴാണ് ഡെങ്കിപ്പനി പരത്തുന്ന വൈറസുകള് അയാളുടെ ഉള്ളിലെത്തുന്നത്.
രോഗിയുടെ രക്തം കുടിക്കുമ്പോള് വൈറസ് കൊതുകിന്റെ ഉമിനീര് ഗ്രന്ഥികളില് എത്തുന്നു. മറ്റൊരാളെ ആ കൊതുക് കുത്തുമ്പോള് വൈറസ് അയാളിലേക്ക് പകരുന്നു. ഫ്ളേവി വിഭാഗത്തിലുള്ള ആര്ബോ വൈറസകള് ബാധിക്കുമ്പോഴാണ് ഡെങ്കിപ്പനി പിടിപെടുന്നത്.