തൊടുപുഴ: കുരുന്നുകളുടെ പാഠശാലയായ അങ്കണവാടികള് അടിസ്ഥാനസൗകര്യങ്ങള്ക്കായി കാത്തിരിപ്പ് തുടരുന്നു. വൈദ്യുതിയും കുടിവെള്ളവും സ്വന്തം കെട്ടിടവുമില്ലാതെ ജില്ലയിലെ ഒട്ടേറെ അങ്കണവാടികള് ഇപ്പോഴും പ്രതിസന്ധികളിലൂടെയാണ് മുന്നോട്ട് പോകുന്നത്. കോവിഡ് വ്യാപനത്തോടെ അടച്ചിട്ടിരുന്നവ ദിവസവും തുറക്കാനുള്ള തീരുമാനം വന്നതിനു പിന്നാലെ മലയോര ജില്ലയിലെ അങ്കണവാടികള്ക്ക് അടിസ്ഥാന സൗകര്യം ഉറപ്പാക്കണമെന്ന ആവശ്യവും ശക്തമായി.
സ്വന്തം കെട്ടിടമില്ലാതെ 297 എണ്ണം : ജില്ലയില് ആകെ 1561 അങ്കണവാടികളാണുള്ളത്. ഇവയില് 1264 എണ്ണത്തിനാണ് സ്വന്തം കെട്ടിടമുള്ളത്. 115 എണ്ണം വര്ഷങ്ങളായി വാടകക്കെട്ടിടങ്ങളില് പ്രവര്ത്തിക്കുന്നു. 182 എണ്ണം വാടകരഹിത കെട്ടിടങ്ങളില്. വ്യക്തികളും കൂട്ടായ്മകളും തല്ക്കാലത്തേക്ക് വാടക ഒഴിവാക്കി നല്കിയ കെട്ടിടങ്ങളാണ് ഈ 182 എണ്ണം. സ്വന്തമല്ലാത്ത കെട്ടിടങ്ങളില് പ്രവര്ത്തിക്കുന്നതുകൊണ്ടുതന്നെ ഇവിടങ്ങളില് അസൗകര്യവും പരിമിതികളും ഏറെയാണ്. ഭൂമി ലഭ്യമായ സ്ഥലങ്ങളില് തദ്ദേശസ്ഥാപനങ്ങളുടെയും സാമൂഹികനീതി വകുപ്പിെന്റയും ഫണ്ട് ഉപയോഗിച്ച് കെട്ടിടം പണി നടക്കുന്നുണ്ട്. എന്നാല്, സ്ഥലം കിട്ടാനില്ല എന്നതാണ് ഭൂരിഭാഗത്തിനും സ്വന്തം കെട്ടിടമെന്ന ലക്ഷ്യത്തിന് മുന്നിലെ പ്രധാന വെല്ലുവിളിയെന്ന് ബന്ധപ്പെട്ടവര് പറയുന്നു. മറ്റ് വകുപ്പുകളുടെ അധീനതയിലുള്ളതും പുറമ്പോക്ക് ഭൂമിയും വിട്ടുകിട്ടാന് ശ്രമം തുടരുന്നു എന്നാണ് അധികൃതരുടെ വിശദീകരണം.
വെളിച്ചത്തിനും വെള്ളത്തിനും ദാഹം : ജില്ലയിലെ 203 അങ്കണവാടികളില് ഇനിയും വൈദ്യുതി എത്തിയിട്ടില്ല. വൈദ്യുതി ഉല്പാദനത്തിന്റെ നാടായ ഇടുക്കിയാണ് വൈദ്യുതീകരിക്കാത്ത അങ്കണവാടികള് ഏറ്റവും കൂടുതലുള്ള ജില്ല. ഇതിനായുള്ള നടപടികള് വര്ഷങ്ങളായി എങ്ങുമെത്താത്ത അവസ്ഥയിലാണ്. ഇതിനെക്കാള് രൂക്ഷമാണ് കുടിവെള്ള പ്രശ്നം. 697 എണ്ണത്തിന് കുടിവെള്ളസൗകര്യമില്ല. അയല്വീടുകളെയോ സ്ഥാപനങ്ങളെയോയാണ് ഇതിനായി ആശ്രയിക്കുന്നത്. കുട്ടികള്ക്കുള്ള ഭക്ഷണം പാചകം ചെയ്യാന് ഇവിടങ്ങളില്നിന്ന് വെള്ളം തലച്ചുമടായി കൊണ്ടുവരേണ്ട അവസ്ഥയുമുണ്ട്. ജലനിധി പദ്ധതിയില്പെടുത്തി 697 എണ്ണത്തിന് കുടിവെള്ള കണക്ഷന് ലഭ്യമാക്കാന് ഐ.സി.ഡി.എസ് വിഭാഗം അപേക്ഷ നല്കിയിട്ടുണ്ടെങ്കിലും ഇക്കാര്യത്തില് ഇനിയും നടപടിയായിട്ടില്ല. അങ്കണവാടികള് വഴി കൗമാരക്കാര്ക്കടക്കം ലഭ്യമാക്കിയിരുന്ന പോഷകവസ്തുക്കള് തദ്ദേശസ്ഥാപനങ്ങളുടെ ഫണ്ടിന്റെ അപര്യാപ്തതമൂലം ഇപ്പോള് മുടങ്ങിയിരിക്കുകയാണ്.
അടിസ്ഥാന സൗകര്യം ഉറപ്പാക്കും -ജില്ല വികസന കമീഷണര് : അങ്കണവാടികളുടെ അടിസ്ഥാന സൗകര്യം ഉറപ്പാക്കാന് ബന്ധപ്പെട്ടവരുടെ യോഗം ഉടന് വിളിക്കുമെന്ന് ജില്ല വികസന കമീഷണര് അര്ജുന് പാണ്ഡ്യന് ‘മാധ്യമ’ത്തോട് പറഞ്ഞു. വൈദ്യുതീകരിക്കാത്ത അങ്കണവാടികളുടെ വിവരം ശേഖരിക്കും. മുമ്പ് ചേര്ന്ന യോഗത്തില് വൈദ്യുതീകരണത്തിന് നിര്ദേശം നല്കിയിരുന്നു. അങ്കണവാടികളുടെ അടിസ്ഥാന സൗകര്യം വര്ധിപ്പിക്കുന്നതുമായി ബന്ധപ്പെട്ട പദ്ധതികള് സമര്പ്പിക്കാന് തദ്ദേശസ്ഥാപനങ്ങളോടും നിര്ദേശിച്ചിട്ടുണ്ട്. മൂന്നാര്, പീരുമേട് മേഖലകളില് ഭൂമി ലഭ്യമല്ലാത്തത് സ്വന്തം കെട്ടിടം നിര്മിക്കാന് തടസ്സമാണ്. ഈ പ്രശ്നവും പരിഹരിക്കും. അടുത്ത യോഗം നിലവിലെ സ്ഥിതി വിലയിരുത്തി തുടര്നടപടികള് കൈക്കൊള്ളുമെന്നും കമീഷണര് അറിയിച്ചു.