![“Manju”](https://santhigirinews.org/wp-content/uploads/2020/04/YOUTUBE.jpg")
ബെര്‍ലിന്‍: കോവിഡ് വാക്സിനെടുക്കാത്തവര്‍ക്ക് ലോക്ഡൗണ്‍ ഏര്‍പ്പെടുത്തി ഓസ്ട്രിയ. ഞായറാഴ്ച അര്‍ധരാത്രി മുതല്‍ ലോക്ഡൗണ്‍ പ്രാബല്യത്തില്‍ വന്നതായിറിപ്പോര്‍ട്ട്. ഇരുപത് ലക്ഷം പേരാണ് ഇനി ഓസ്ട്രിയയില്‍ വാക്സിന്‍ സ്വീകരിക്കാനുള്ളത്.
വീണ്ടും യൂറോപ്പില്‍ കോവിഡ് വ്യാപനം രൂക്ഷമായതോടെ പല രാജ്യങ്ങളും പുതിയ നിയന്ത്രണങ്ങള്‍ എര്‍പ്പെടുത്താനാരംഭിച്ചിരുന്നു. ഇൗ പശ്ചാത്തലത്തിലാണ് പുതിയ നിയന്ത്രണം ഏര്‍പ്പെടുത്തിയത്. 12 വയസിന് മുകളില്‍ പ്രായമുള്ള വാക്സിന്‍ എടുക്കാത്തവര്‍ക്ക് ജോലി, അവശ്യ സാധനങ്ങള്‍ വാങ്ങല്‍, വാക്സിനേഷന്‍ എടുക്കല്‍ തുടങ്ങിയ ആവശ്യങ്ങള്‍ക്ക് മാത്രമെ പുറത്തിറങ്ങാന്‍ ഇനി അനുമതിയുള്ളു.
തുടക്കത്തില്‍ 10 ദിവസമാണ് ലോക്ഡൗണ്‍ പ്രഖ്യാപിച്ചിരിക്കുന്നത്. പുറത്തിറങ്ങുന്ന ആളുകള്‍ വാക്സിനെടുത്തിട്ടുണ്ടോ എന്ന് പരിശോധിക്കാന്‍ പൊലീസിനോട് നിര്‍ദേശിച്ചിട്ടുണ്ട്. പടിഞ്ഞാറന്‍ യൂറോപ്പിലെ ഏറ്റവും കുറവ് വാക്സിനേഷന്‍ നിരക്കുള്ള രാജ്യങ്ങളിലൊന്നാണ് ഓസ്ട്രിയ. മൊത്തം ജനസംഖ്യയുടെ ഏകദേശം 65 ശതമാനം പേര്‍ മാത്രമാണ് പൂര്‍ണമായി വാക്സിനേഷന്‍ എടുത്തത്. ഞായറാഴ്ച രാജ്യത്ത് 11,552 പുതിയ കോവിഡ് കേസുകളാണ് റിപ്പോര്‍ട്ട് ചെയ്തത്.
