കണ്ണൂര്: പ്രശസ്ത മാപ്പിളപ്പാട്ട് ഗായകന് പീര് മുഹമ്മദ് അന്തരിച്ചു. 75 വയസായിരുന്നു. വാര്ധക്യ സഹജമായ അസുഖത്തെത്തുടര്ന്ന് ചികിത്സയിലായിരുന്നു. കണ്ണൂര് മുഴപ്പിലങ്ങാട്ടെ വസതിയില് ഇന്ന് പുലര്ച്ചെയായിരുന്നു അന്ത്യം.
‘ഒട്ടകങ്ങള് വരിവരിവരിയായ് കാരയ്ക്ക മരങ്ങള് നിരനിരനിരയായ്..’, ‘കാഫ് മല കണ്ട പൂങ്കാറ്റേ കാണിക്ക നീ കൊണ്ടു വന്നാട്ടേ..’ തുടങ്ങിയ പ്രശസ്ത ഗാനങ്ങള് ആലപിച്ചത് പീര് മുഹമ്മദാണ്. 1976ല് ഇന്ത്യന് ടെലിവിഷന് ചരിത്രത്തില് ആദ്യമായി ദൂരദര്ശനില് ചെന്നൈ നിലയത്തില് മാപ്പിളപ്പാട്ട് അവതരിപ്പിച്ച പ്രതിഭയാണ് പീര് മുഹമ്മദ്.
1945 ജനുവരി 8 ന് തമിഴ്നാട്ടിലെ തെങ്കാശിക്കടുത്തുള്ള ‘സുറണ്ടൈ’ ഗ്രാമത്തിലാണ് ജനനം. അസീസ് അഹമ്മദിന്റെയും ബല്ക്കീസിന്റെയും മകനാണ്. തേന്തുള്ളി, അന്യരുടെ ഭൂമി എന്നീ സിനിമകളിലും പാടി. 1957-90 കളില് എച്ച്എംവിയിലെ ആര്ട്ടിസ്റ്റായിരുന്നു. സൗത്ത് ഇന്ത്യന് ഫിലിം ഫെയര് അവാര്ഡ് നൈറ്റില് മാപ്പിളപ്പാട്ട് അവതരിപ്പിക്കാനുള്ള അവസരം ലഭിച്ച ഏക വ്യക്തി കൂടിയാണ് പീര് മുഹമ്മദ്. കേരളത്തിനകത്തും പുറത്തുമായി ആയിരത്തോളം പരിപാടികള് അവതരിപ്പിച്ചിട്ടുണ്ട്. ആയിരത്തോളം കാസറ്റുകളും പുറത്തിറക്കിയിട്ടുണ്ട്