‘ഹൃദയം’ ജനുവരിയിൽ; റിലീസ് തീയതി പ്രഖ്യാപിച്ച് മോഹൻലാൽ
മലയാള സിനിമ പ്രേമികൾ ഏറെ ആകാംക്ഷയോടെ കാത്തിരിക്കുന്ന പ്രണവ് മോഹൻലാൽ ചിത്രമാണ് ‘ഹൃദയം’.
കൊച്ചി: മലയാള സിനിമ പ്രേമികൾ ഏറെ ആകാംക്ഷയോടെ കാത്തിരിക്കുന്ന പ്രണവ് മോഹൻലാൽ ചിത്രമാണ് ‘ഹൃദയം’. സിനിമയുടെ പാട്ടുകൾ പുറത്തിറങ്ങിയപ്പോൾ തന്നെ ആരാധകർ കാത്തിരിക്കുകയാണ് ചിത്രത്തിന്റെ റിലീസിനായി. ഇപ്പോഴിതാ കാത്തിരിപ്പുകൾക്ക് വിരാമമിട്ടുകൊണ്ട് ഹൃദയത്തിന്റെ റിലീസ് തീയതി പുറത്തുവിട്ടിരിക്കുകയാണ് ചിത്രത്തിന്റെ അണിയറ പ്രവർത്തകർ.
2022 ജനുവരി 21ന് ചിത്രം തീയറ്ററുകളിൽ എത്തും. മോഹൻലാൽ ആണ് ഹൃദയത്തിന്റെ റിലീസ് തീയതി പ്രഖ്യാപിച്ചത്. കൂടാതെ, ചിത്രത്തിന്റെ സംവിധായകനായ വിനീത് ശ്രീനിവാസനും, പ്രണവും റിലീസ് പോസ്റ്റർ പങ്കുവെച്ചിട്ടുണ്ട്. പാട്ടിന്റെ എണ്ണത്തിൽ റെക്കോർഡിട്ടാണ് ചിത്രം എത്തുന്നത്. 15 ഗാനങ്ങളുള്ള ചിത്രത്തിലെ ‘ദർശന’ എന്ന പാട്ട് ഇതിനോടകം തന്നെ വൻ ഹിറ്റായി മാറിക്കഴിഞ്ഞിരുന്നു. ഇതിനു പിന്നാലെ എത്തിയ മറ്റ് രണ്ട് പാട്ടുകളും ആരാധകരുടെ മനം കവർന്നിരുന്നു.
മെറിലാന്റ് സിനിമാസ് ആന്റ് ബിഗ് ബാങ് എന്റർടൈയ്മെന്റിന്റെ ബാനറിൽ വൈശാഖ് സുബ്രഹ്മണ്യനാണ് ചിത്രം നിർമ്മിക്കുന്നത്. വിശ്വജിത്ത് ഒടുക്കത്തിൽ ഛായാഗ്രഹണം നിർവ്വഹിക്കുന്നു. സിനിമയുടെ സംവിധാനം കൂടാതെ തിരക്കഥയും വിനീത് ശ്രീനിവാസനാണ്.
യുവ നടിമാരായ കല്യാണി പ്രിയദർശനും ദർശന രാജേന്ദ്രനുമാണ് ചിത്രത്തിലെ നായികമാർ. അജു വർഗ്ഗീസ്, ബൈജു സന്തോഷ്, അരുൺ കുര്യൻ, വിജയരാഘവൻ തുടങ്ങിയവരും മുൻനിരയിലുണ്ട്. ഹൃദയം തീയേറ്ററിലായിരിക്കും റിലീസ് ചെയ്യുക എന്ന് നിർമ്മാതാവ് വൈശാഖ് സുബ്രഹ്മണ്യം നേരത്തെ വ്യക്തമാക്കിയിരുന്നു.