ലഖ്നോ: ഝാന്സി റെയില്വേ സ്റ്റേഷന്റെ പേരുമാറ്റി യോഗി സര്ക്കാര്. വീരാംഗന ലക്ഷ്മിഭായി റെയില്വേ സ്റ്റേഷന് എന്നായിരിക്കും ഝാന്സി റെയില്വേ സ്റ്റേഷന്റെ പുതിയ പേര്. ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് തന്നെയാണ് ഔദ്യോഗിക ട്വിറ്റര് പേജിലൂടെ പേരുമാറ്റം അറിയിച്ചത്.
യു.പി സര്ക്കാര് പുറത്തിറക്കിയ നോട്ടിഫിക്കേഷന് പ്രകാരം റെയില്വേ സ്റ്റേഷന്റെ പേരുമാറ്റാനുള്ള നടപടികള്ക്ക് തുടക്കം കുറിച്ചതായി നോര്ത്ത് സെന്റട്രല് റെയില്വേ പി.ആര്.ഒ ശിവം ശര്മ്മ അറിയിച്ചു. റെയില്വേ സ്റ്റേഷന്റെ പേരുമാറ്റത്തിന് ആഭ്യന്തര മന്ത്രാലയം അനുമതി നല്കിയതോടെയാണ് ഇതിനുള്ള നടപടികള്ക്ക് റെയില്വേ തുടക്കം കുറിച്ചത്.
അതെ സമയം നേരത്തെ മുഗള്സരായ് റെയില്വേ സ്റ്റേഷന്റെ പേര് ദീന് ദയാല് ഉപാധ്യായ ജംക്ഷന് എന്നാക്കി മാറ്റിയിരുന്നു. ഫൈസബാദ് റെയില്വേ റെയില്വേ സ്റ്റേഷന്റെ പേര് അയോധ്യ കാന്റ് എന്നും ഫൈസബാദ്, അലഹബാദ് നഗരങ്ങളുടെ പേരുകള് അയോധ്യ, പ്രയാഗ്രാജ് എന്നാക്കിയും മാറ്റിയിരുന്നു.