മറക്കാൻ പറ്റാത്ത നിമിഷങ്ങൾ പങ്ക് വച്ച് ബാബു ആന്റണി
കാര്ണിവൽ എന്ന സിനിമ കണ്ടവരാരും അതിലെ മരണക്കിണർ രംഗം മറക്കില്ല. പി.ജി വിശ്വംഭരൻ സംവിധാനം ചെയ്ത് എസ്.എൻ സ്വാമി തിരക്കഥയെഴുതിയ കാർണിവൽ 1989-ലാണ് പ്രദർശനത്തിനെത്തിയത്. മമ്മൂട്ടിയും പാർവ്വതിയും പ്രധാന വേഷങ്ങളിലെത്തിയ ചിത്രമായിരുന്നു ഇത്.
ഇതിൽ സുകുമാരൻ നടത്തുന്ന സർക്കസ് തമ്പിൽ മരണക്കിണറിലൂടെ അതിസാഹസികമായി ബൈക്ക് ഓടിക്കുന്ന അഭ്യാസി. ബാബു ആന്റണിയാണ് ആ വേഷം ചെയ്തത്. ഡ്യൂപ്പായിരിക്കും ആ രംഗം ചെയ്തതെന്നാണ് പ്രേക്ഷകർ കരുതിയിരിക്കുക. എന്നാൽ ഒരു ഡ്യൂപ്പുമില്ലാതെ മരണക്കിണറിലൂടെ ബൈക്ക് ചീറിപ്പായിച്ചത് ബാബു ആന്റണി തന്നെയാണ്. ഇപ്പോൾ വർഷങ്ങൾക്കിപ്പുറം ആ ഓർമയുടെ ചിത്രം പങ്കിട്ടിരിക്കുകയാണ് താരം.
‘ എന്റെ ജീവിതത്തിൽ മറക്കാൻ പറ്റാത്ത ഒരു നിമിഷം. കാർണിവൽ എന്ന ചിത്രത്തിനുവേണ്ടി മരണക്കിണറിൽ ബൈക്ക് ഓടിക്കുന്നതിനു മുൻപ്, നിശബ്ദവും നിശ്ചലവും എന്ന് തോന്നിയ ഒരു നിമിഷം. യൂണിറ്റ് മൊത്തം നിശബ്ദമായ ഒരു നിമിഷം. പേടി തോന്നിയില്ല. കാരണം തിരിച്ചിറങ്ങാൻ കഴിഞ്ഞാൽ നല്ലതെന്നു മാത്രം വിചാരിച്ചു. സിനിമ നന്നായി സ്വീകരിക്കപ്പെട്ടതിൽ സന്തോഷം ‘ ഇത്തരത്തിലാണ് ബാബു ആന്റണിയുടെ ഫേസ്ബുക്ക് പോസ്റ്റ്.
താരത്തിന്റെ ഫേസ്ബുക്ക് പോസ്റ്റ് ഏറ്റെടുത്ത് ആരാധകരും രംഗത്തെത്തി . ‘ ഒരു ഹെൽമെറ്റ് പോലും വെക്കാതെ ഉള്ള മാസ്സ്, ധൈര്യം അപാരം തന്നെ മാസ്റ്റർ‘ എന്നാണ് ചിലരുടെ കമന്റ്. കാർണിവൽ കാണുന്ന സമയത്ത് കൂട്ടുകാരുടെ ഇടയിൽ ഉണ്ടായിരുന്ന സംശയം മമ്മൂട്ടിയും ബാബു ആന്റണിയും തല്ലുണ്ടായാൽ ആര് ജയിക്കും എന്നായിരുന്നുവെന്നും ചിലർ പറയുന്നു.