ഗോപിചന്ദിന്റെ ആത്മകഥ എജുകഫേയില് പ്രകാശിതമാകും
ദുബൈ: ചിലരുടെ ജീവിതാനുഭവങ്ങള് തലമുറകളെ പ്രചോദിപ്പിക്കും. ഇന്ത്യയുടെ കായികചരിത്രത്തിലെ അത്തരമൊരു വ്യക്തിത്വമാണ് പുല്ലേല ഗോപിചന്ദ്.പ്രതിസന്ധികളിലൂടെ കടന്നുവന്ന് ലോകോത്തര താരമായി ഉയര്ന്നുവരുകയും പിന്നീട് വിശ്വകിരീടങ്ങള് നേടിയ ശിഷ്യരെ വാര്ത്തെടുക്കുകയും ചെയ്ത ജീവിതമാണദ്ദേഹത്തിന്റേത്. ലോകതാരങ്ങള്ക്ക് മുന്നില് പതറാതെ എങ്ങനെ പൊരുതാം എന്ന് പഠിപ്പിച്ച അദ്ദേഹത്തിന്റെ കരുത്തിലായിരുന്നു സൈന നെഹ്വാളും പി.വി. സിന്ധുവുമെല്ലാം ലോകചാമ്പ്യന്ഷിപ്പിലും ഒളിമ്പിക്സിലുമെല്ലാം വിജയികളായത്. ബാഡ്മിന്റണ് ഇതിഹാസവും ദേശീയ ടീമിന്റെ ചീഫ് കോച്ചുമായ ഗോപിചന്ദിന്റെ ആത്മാനുഭവങ്ങളുടെ മനോഹരമായ എഴുത്താണ് ഇതിനകം ഏറെ പേരെ ആകര്ഷിച്ച അദ്ദേഹത്തിന്റെ ജീവിതകഥയായ ‘ഷട്ട്ലേഴ്സ് ഫ്ലിക്ക്: മേകിങ് എവ്രി മാച്ച് കൗണ്ട്’എന്നത്. ഗോപിചന്ദിനെ അറിയാന് ആഗ്രഹിക്കുന്നവര് വായിച്ചിരിക്കേണ്ട പുസ്തകത്തിന്റെ ദുബൈയിലെ പ്രകാശനം എജൂകഫേ വേദിയില് നടക്കും. ആസ്റ്റര് ഡി.എം ഹെല്ത്ത് കെയര് ചെയര്മാനും എം.ഡിയുമായ ഡോ. ആസാദ് മൂപ്പന് പ്രകാശനം നിര്വഹിക്കും.